गान्तोक, 16 मई। सिक्किम राज्य स्थापनाको स्वर्ण जयन्ती समारोह आज राजधानीमा भव्यरूपमा हर्षोल्लासका साथ मनाइयो। स्वर्ण जयन्ती समारोहको शुरूवात बिहान एमजी मार्गबाट निकालिएको ‘तिरंगा यात्रा’ बाट भएको थियो। मुख्यमन्त्री प्रेमसिंह तामाङले अगुवाई गरेको तिरंगा यात्रा पाल्जोर स्टेडियम पुगेपछि राज्यस्तरीय राज्य स्थापना समारोहमा परिणत बन्यो। यसपछि, तेस्रो चरणको कार्यक्रम मनन केन्द्रमा सम्पन्न भयो भने समारोहको समापन सॉंझ पाल्जोर स्टेडियममा बलीवुडका प्रसिद्ध गायक लकी अलीको साङ्गीतिक प्रस्तुतिको साथमा भयो।
पाल्जोर स्टेडियममा आयोजित राज्यस्तरीय राज्य स्थापना दिवस समारोहमा मुख्य अतिथिको रूपमा उपस्थित राज्यपाल ओम प्रकाश माथुरले 50औं स्थापना दिवसको राज्यवासीहरूलाई हार्दिक बधाई एवं शुभकामना दिए। सिक्किमले विकास र सांस्कृतिक एकीकरणको सन्दर्भमा लामो यात्रा तय गरेको उनले बताए। उनले आफ्नो सम्बोधनमा गन्जु लामा, डेनी डेञ्जोङपा र भाइचुङ भोटियाको नाम उल्लेख गर्दै उनीहरूले आफ्नो कडा परिश्रमको बलमा सिक्किमको नाम अन्तरराष्ट्रिय स्तरमा पुर्याएकोमा बताए।
राज्यपालले प्रधानमन्त्री नरेन्द्र मोदीलाई उत्तरपूर्वी क्षेत्रको विकासमा ध्यान केन्द्रित गरेकोमा धन्यवाद दिॅंदै राज्यको व्यापक विकास भएको बताए। यसैगरी, उनले राज्यका मुख्यमन्त्रीलाई पनि केन्द्रिय योजनाहरू कार्यान्वयन गरेकोमा धन्यवाद दिए, जसले राज्यको विशेष गरी समाजको ग्रामीण क्षेत्रमा विकास ठूलो योगदान पुगेको बताए। राज्यपालले राज्यको विकासमा योगदान पुर्याउने सबैलाई हार्दिक धन्यवाद व्यक्त गरे र निकट भविष्यमा पनि प्रयासहरू जारी रहने आशा व्यक्त गरे।
विशिष्ट अतिथिको रूपमा उपस्थित मुख्यमन्त्री प्रेमसिंह तामाङले राज्य दिवसको सबैमा हार्दिक शुभकामना व्यक्त गरे। उनले सिक्किमको इतिहासमाथि प्रकाश पार्दै विगत पाँच दशकमा भारतीय संघमा सिक्किमले ठूलो विकास देखेको बताए। उनले सिक्किममा लोकतन्त्र स्थापना गर्न बहुमूल्य प्रयासको लागि सिक्किमका प्रथम मुख्यमन्त्री एलडी काजीप्रति श्रद्धाञ्जलि अर्पण गरे।
शिक्षाको बारेमा बोल्दै मुख्यमन्त्रीले समाजका सीमान्तकृत वर्गका विद्यार्थीहरूलाई माथि उठाउने राज्य सरकारले शुरू गरेका विभिन्न योजनाहरूमाथि प्रकाश पारे। उनले राज्यमा शिक्षाको सुधारका लागि आफ्नो प्रशासनले लिएका पहलहरू जस्तै तिमी तार्कुमा कञ्चनजङ्घा राज्य विश्वविद्यालय, नेता सुभाषचन्द्र बोस उत्कृष्टता केन्द्र, असम लिङ्गजेमा मोडल स्कूल र आगामी राष्ट्रिय प्रौद्योगिकी संस्थानबारे जानकारी गराए।
उनले महिला सशक्तिकरणको दिशामा शुरू गरिएका वात्सल्य योजना र बाहिनी योजना आदि बारे पनि जानकारी गराए। मुख्यमन्त्रीले पर्यटन क्षेत्रको महत्त्वमा जोड दिॅंदै पर्यटकहरूलाई आकर्षित गर्ने राज्यको अपार सम्भावना रहेको बताए। उनले आफ्नो सम्बोधनमा आतङ्कवादलाई निष्प्रभावी बनाउन हालैको सफलतालाई प्रकाश पार्दै मातृभूमिको रक्षा गर्न निस्वार्थ प्रयास गरेकोमा भारतीय सेनाप्रति सम्मान व्यक्त गरे।
