रिनाक फेरि एक ऐतिहासिक सङ्क्रमणकालको उभ्याइमा छ: भीम राउत, स्थापित पत्रकार।

यसपटक रिनाकको आकाशमा देखिएका प्याराग्लाइडिङका रङ्गीन पङ्खहरू केवल मनोरञ्जन र साहसिक उडानका प्रतीक मात्र थिएनन्, ती रिनाकको पर्यटन भविष्यतर्फको नयाँ टेकअफ पनि थिए।
रिनाक पर्यटन विकास समितिद्वारा आयोजित उडान महोत्सव तथा प्याराग्लाइडिङ एक्युरेसी प्रतियोगिताले आर्थिक, सामाजिक, सांस्कृतिक र पर्यटन क्षेत्रका नयाँ सम्भावनाहरू खोज्ने इमानदार र दुरदर्शी प्रयासको संकेत दिएको छ। यो पहलले रिनाक अब केवल भूगोलमा सीमित गाउँ होइन, सम्भावनाले उडान भर्नसक्ने गन्तव्य हो भन्ने आत्मविश्वास जगाएको छ।
विगतमा रिनाकको श्रम, पसिना र योगदानको इतिहास किताबका पानामा खासै भेटिँदैन। दरवारी कथाहरू भने प्रशस्त छन्, तर ओल्ड सिल्क रूटका गोरेटो, खच्चड बिसाउने ठाउँहरू, सिक्किम पुलिसको स्थापना, चन्द्र नर्सरीको ऐतिहासिक भूमिका, रामगौरी सङ्ग्रहालयको महत्त्व तथा स्थानीय श्रमिकहरूको अमूल्य योगदान, यी सबै इतिहास व्यवहारमा जीवित रहे, तर लेखनमा ओझेल परे।
आज रोडाथाङको पारम्परिक माघे मेलाबाट नयाँ सम्भावनाको कथाले फेरि शिर उठाउन थालेको छ। आरिटार डाक बङ्गलो, ओल्ड सिल्क रूट, चन्द्र नर्सरी, पुरानो पोस्ट अफिस, सिक्किम पुलिस स्थापना भएको स्थल र रामगौरी सङ्ग्रहालयजस्ता धरोहरका कथाहरू अब हामीले आकाशबाट उडेर यस धर्तीमा अवतरण गरेका पर्यटकहरूलाई सुनाउनुपर्ने चेतनाको उज्यालो हामीभित्र बल्न थालेको छ।
यसै सन्दर्भमा, प्रत्येक वर्ष “रिनाक धरोहर उत्सव” आयोजना गर्नुपर्ने बोध पनि अब स्पष्ट बन्दै गएको छ। मनोरञ्जनसँगै हाम्रो संस्कृति, पहिचान र पृथक ऐतिहासिक गाथा संसारलाई सुनाउनु आजको आवश्यकता हो।
अब रिनाकलाई ऐतिहासिक सङ्क्रमणकालको दलानबाट निकालेर स्वर्णिम युगको आँगनतर्फ लैजान नयाँ पुस्ताले पुरानो पुस्तासँग हातेमालो गर्नैपर्छ। अझ महत्वपूर्ण कुरा, मुख्यमन्त्री स्वयं रिनाक समष्टिका विधायक रहनुभएको वर्तमान अवस्थामा, रिनाकलाई सबै क्षेत्रबाट नयाँ दिशातर्फ डोर्याउने जिम्मेवारी हाम्रो काँधमा आएको छ।
रिनाक पर्यटन विकास समितिसँगै स्थानीय समुदायको सोच, पहल र सक्रियताले आशाको उज्यालो देखाएको छ। यो यात्रालाई निरन्तरता दिन सक्यौँ भने, रिनाक केवल इतिहास बोकेको ठाउँ होइन इतिहास र भविष्यलाई जोड्ने उडान स्थल बन्नेछ।