लाचुङ जुम्साका नवनिर्वाचित पिपनहरूले शपथ ग्रहण गरे

मङ्गन, 05 जनवरी । लाचुङ जुम्साका नवनिर्वाचित पिपनहरूले पद तथा गोपनीयताको शपथ ग्रहण गरेका छन्। मङ्गन जिल्लापालको कार्यालयमा आज सम्पन्न एक कार्यक्रमबीच नवनिर्वाचित पिपनहरूलाई जिल्लापाल अनन्त जैनले शपथ दिलाए। शपथ ग्रहणपछि जिल्लापालले लाचुङका निर्वाचित पिपनहरूलाई प्रमाणपत्र प्रदान गरे।
उल्लेख्य, लाचुङ जुम्साको चुनाउ 20 दिसम्बर, 2025 मा सम्पन्न भएको थियो। चुनाउमा खेदुम ब्लकबाट चुङटुक छिरिङ लाचुङ्गपा र लेमा ब्लकबाट सोनाम छिरिङ लाचुङ्गपा पिपन निर्वाचित भएका छन्। शपथ ग्रहण समारोहका साथै पिपनहरूले आगामी एक वर्षका लागि आफ्नो कार्यभार सम्हालेका छन्।
यस अवसरमा मङ्गनका पुलिस अधीक्षक एलबी छेत्री, एडीसी चुङथाङ हेम सागर काफ्ले, बीडीओ कैलाश थापा तथा अन्य अधिकारीहरू पनि उपस्थित थिए।