लाचेनमा आएको फ्ल्याश फ्लड विषय मुख्य सचिवसॅंग महत्वपूर्ण बैठक आयोजित

गान्तोक, 17 जून। उत्तर सिक्किमको लाचेनमा आएको आकस्मिक बाढी (फ्ल्याश फ्लड) लाई लिएर राहत र सुरक्षा उपायहरूबारे छलफल गर्न लाचेन मंगन निर्वाचन क्षेत्रका विधायक तथा मन्त्री साम्डुप लेप्चाको अध्यक्षतामा आज मुख्य सचिवको कार्यालय, टाशीलिङ सचिवालयमा एक महत्त्वपूर्ण बैठक आयोजन गरियो। बैठकमा पिपन बन्दु लाचेनपा र लाचेन जुम्साका सदस्यहरू पनि उपस्थित थिए।
गत 29 मई, 2025 मा आएको फ्ल्याश फ्लडले लाचेनका जनतालाई ठूलो हानि पुऱ्याएको छ। बैठकमा प्रभावित समुदायहरूलाई सहयोग गर्न तत्काल राहत र सुरक्षा उपायहरूबारे छलफल गरियो। बैठकमा अस्थायी पैदल झोलुङ्गे पुलहरूको निर्माण, बिजुली लाइनहरू (66 केभी पिलर) र मोबाइल नेटवर्कहरूको पुनर्स्थापना, लाचेन जुम्सामा आवश्यक वस्तुहरूको आपूर्ति, सरकारी विभागहरूद्वारा प्रभावित क्षेत्रहरूको प्राथमिकतामा मूल्याङ्कन, पिउने पानी सुविधाको पुनर्स्थापना र 13 वटा काठका पुलहरूको निर्माण, जीमा IV देखि जीमा खोला सडक र जीमादेखि सेप्टेतन रोड खुल्ला गर्न कोष आवण्टनको बारेमा व्यापक रूपमा छलफल गरियो।
बैठकमा सरकारद्वारा लाचेनसम्म पहुँच सडकहरूको पुनर्स्थापना कार्यको अनुगमनको महत्त्वलाई जोड दिइयो। सहभागीहरूले राहत र सुरक्षा उपायहरूको समयमै र प्रभावकारी कार्यान्वयन सुनिश्चित गर्न छलफल गरे।
मुख्य सचिवले मागहरूप्रति सकारात्मक प्रतिक्रिया दिएका छन् तथा राहत र पुनर्स्थापना कार्यलाई सहज बनाउन सबै आवश्यक स्वीकृतिहरू प्रदान गर्ने आश्वासन दिएका छन्। प्रभावित समुदायहरूलाई सहयोग गर्ने मुख्य सचिवको आश्वासन र प्रतिबद्धताको लागि सहभागीहरूले कृतज्ञता व्यक्त गरे। लाचेनका प्रभावित जनताको कल्याण सुनिश्चित गर्न सरकार समयमै सहयोग प्रदान गर्न प्रतिबद्ध रहेको मन्त्री लेप्चाको कार्यालयले आज प्रेस विज्ञप्तिमा जनाएको छ।