शिलङमा ७३औँ एनईसीको पूर्ण बैठकमा सिक्किमले विकासका प्राथमिकताहरू प्रस्तुत गर्यो

गान्तोक, 04 जून। सिक्किमका मुख्यमन्त्री प्रेमसिंह तामाङले आज पूर्वोत्तर परिषद् (एनईसी) को ७३औँ पूर्ण बैठकमा सहभागिता जनाए। बैठकको अध्यक्षता केन्द्रिय गृहमन्त्री तथा एनईसीका अध्यक्ष अमित शाहले गरेका थिए। कार्यक्रममा पूर्वोत्तर क्षेत्र विकास मन्त्रालय (डोनर) का केन्द्रिय मन्त्री ज्योतिरादित्य एम. सिन्धिया, विभिन्न पूर्वोत्तर राज्यका राज्यपालहरू, मुख्यमन्त्रीहरू तथा वरिष्ठ अधिकारीहरूको उपस्थिति रहेको थियो।मुख्यमन्त्री कार्यालयका अनुसार, बैठकमा मुख्यमन्त्रीले ‘विकसित भारत २०४७’ को परिकल्पना अनुरुप सिक्किमका प्रमुख विकास प्राथमिकताहरू प्रस्तुत गरे। उनले जैविक कृषि, पर्यटन, शिक्षा, सीप विकास, सूक्ष्म, साना तथा मझौला उद्यम (एमएसएमई), नवप्रवर्तन तथा पूर्वाधार विकासलाई विशेष प्राथमिकता दिनुपर्नेमा जोड दिए।मुख्यमन्त्रीले पूर्वोत्तर क्षेत्रमा कृषि मूल्य शृङ्खला र बजार पहुँचलाई सुदृढ़ बनाउनुपर्ने आवश्यकता औँल्याउँदै ‘मिशन अर्गानिक भ्यालु चेन डेभलपमेन्ट फर नर्थ इस्टर्न रिजन’ (एमओभीसीडीएनईआर) योजनालाई निरन्तरता दिन आग्रह गरे। साथै, ‘नर्थ इस्ट इन्डस्ट्रियल एन्ड इन्भेस्टमेन्ट प्रमोसन पोलिसी’ (एनईआईआईपीपी) अन्तर्गतका सुविधाहरू सन् २०२७ पछिसम्म पनि विस्तार गर्न अनुरोध गरे।पूर्वोत्तर क्षेत्रमा कृषि तथा बागवानी क्षेत्रका मूल्य शृङ्खला र बजार पहुँचमा रहेका कमीहरू सम्बोधन गर्न गठित उच्चस्तरीय कार्यदलका संयोजकको हैसियतले मुख्यमन्त्रीले कार्यदलका सिफारिसहरू समेटिएको विस्तृत प्रस्तुति पनि दिए। प्रतिवेदनमा मूल्य शृङ्खला सुदृढीकरण, बजार पहुँच विस्तार, कृषि उत्पादकत्व वृद्धि, मूल्य अभिवृद्धि तथा कृषि र बागवानी क्षेत्रमा दिगो विकासलाई प्रवर्द्धन गर्ने रणनीतिक उपायहरू समावेश गरिएको थियो।मुख्यमन्त्रीले बारम्बार हुने आकस्मिक बाढीका कारण उत्पन्न चुनौतीहरूबारे पनि ध्यानाकर्षण गराउँदै एनएच १० को सम्पर्क समस्याको स्थायी समाधान खोज्नुपर्ने आवश्यकता औँल्याए। साथै, सड़क, रेल, हवाई तथा डिजिटल पूर्वाधारसम्बन्धी प्रमुख परियोजनाहरू शीघ्र सम्पन्न गर्न आग्रह गर्दै उत्तर सिक्किमको ताराम छु क्षेत्रमा प्रभावित चुङथाङ-लाचेन सड़कको तत्काल पुनर्स्थापनाको माग राखे।बैठकका छलफलहरूले पूर्वोत्तर क्षेत्रको विशाल सम्भावनालाई उपयोग गर्दै किसान, स्थानीय समुदाय तथा भावी पुस्ताको हितका लागि दिगो, समावेशी र उत्थानशील विकासलाई अगाडि बढाउने साझा प्रतिबद्धता झल्काएको बताइएको छ।मुख्यमन्त्रीले पूर्वोत्तर क्षेत्रको विकासप्रति दूरदर्शी नेतृत्व र प्रतिबद्धताका लागि केन्द्रिय गृहमन्त्री अमित शाहप्रति आभार व्यक्त गरे। साथै, डोनर मन्त्री ज्योतिरादित्य एम. सिन्धिया, डोनर मन्त्रालय, एनईसी सचिवालय, मेघालयका मुख्यमन्त्री कोनराड के. सांगमाको नेतृत्वमा रहेको मेघालय सरकार तथा असम र पश्चिम बंगाल सरकारप्रति आतिथ्य र सहयोगका लागि धन्यवाद ज्ञापन गरे।