सांसद सुब्बाले शिक्षा राज्यमन्त्री चौधरीसँग भेट गरी कक्षा ११-१२ मा क्षेत्रीय भाषालाई समावेश गर्न माग गरे

गान्तोक, 11 अगस्त। सिक्किमका लोकसभा सांसद डा. इन्द्रहाङ सुब्बाले शिक्षा राज्यमन्त्री जयन्त चौधरीसँग भेट गरी सीबीएसईअन्तर्गत कक्षा ११ र १२ मा राई, शेर्पा, तामाङ र गुरुङ भाषालाई दोस्रो वैकल्पिक मातृभाषा विषयका रूपमा समावेश गर्न पुनर्विचार गर्न माग गर्दै पत्र बुझाएका छन्। उक्त जानकारी आज सांसदको कार्यालयद्वारा जारी प्रेस विज्ञप्तिमा दिइएको छ।
भेटका क्रममा सांसद सुब्बाले यी भाषाहरू सीबीएसईअन्तर्गत कक्षा १० सम्म अध्ययनका लागि पहिल्यै उपलब्ध रहेको र आवश्यक शैक्षिक संरचना, पाठ्यक्रम तथा अध्यापन प्रणालीसमेत कायम रहेको उल्लेख गरे। उनले कक्षा १० पछि वरिष्ठ माध्यमिक तहमा समेत यी भाषाहरूको अध्ययनलाई निरन्तरता दिन पाउनु स्वाभाविक प्रक्रिया हुने तथा यसले विद्यार्थीहरूलाई आफ्नो क्षेत्रीय एवं मौलिक भाषाको अध्ययनलाई कक्षा १० भन्दा माथि पनि निरन्तरता दिने अवसर प्रदान गर्ने बताए।
सांसद सुब्बाले यी भाषाहरू रोज्ने विद्यार्थीहरूले सामान्यतया अन्य विषयको सट्टामा उक्त भाषा विषय छनोट गर्ने भएकाले थप परीक्षा तालिका तथा व्यवस्थापनसँग सम्बन्धित चुनौतीहरू अनुमान गरिएजति ठूलो नहुन सक्ने पनि बताए। उनले भारतको समृद्ध भाषिक विविधताको संरक्षण तथा प्रवर्द्धन गर्ने व्यापक उद्देश्यअनुरूप कक्षा ११ र १२ मा पनि यी भाषाहरूको अध्ययनको अवसर विस्तार गर्न यस विषयमा मन्त्रालयलाई आफ्नो निर्णयमाथि पुनर्विचार गर्न आग्रह गरे।
सांसद सुब्बाले यस विषयमा छलफल गर्ने अवसर प्रदान गरेकोमा शिक्षा राज्यमन्त्री जयन्त चौधरीप्रति आभार व्यक्त गर्दै औपचारिक शिक्षा प्रणालीमा आफ्नो भाषा अध्ययनलाई निरन्तरता दिन चाहने विद्यार्थी तथा समुदायको हितमा आवश्यक पहल गरिदिन आग्रह गरेका छन्।