23औं मुख्यमन्त्री कम्पाउण्ड आर्चरी स्वर्ण कप प्रतियोगिता शुरू

पाकिम, 10 अप्रेलह। पाकिम जिल्लाको कार्थोकस्थित आर्चरी फिल्डमा आजदेखि 23औं मुख्यमन्त्री कम्पाउण्ड आर्चरी स्वर्ण कप प्रतियोगिता शुरू भएको छ। कार्यक्रममा मुख्य अतिथिको रूपमा उपस्थित कृषि एवं बागवानी विभाग मन्त्री पुरण गुरुङको उपस्थितिमा प्रतियोगिता शुभारम्भ गरियो।
उद्घाटन कार्यक्रममा मुख्यमन्त्रीका सल्लाहकार एवं राज्य आर्चरी संघका अध्यक्ष कुङ्गा निमा लेप्चा, क्षेत्र विधायक पामिन लेप्चा, जिल्ला अध्यक्ष लाडेन ल्हमू भोटिया तथा अन्य गणमान्य व्यक्तिहरू उपस्थित थिए।
यो प्रतियोगिता आगामी 27 अप्रेलसम्म चल्नेछ। पाकिम जिल्ला आर्चरी एसोसिएशनले जिल्ला प्रशासन केन्द्रको सहकार्यमा यस प्रतियोगिताको आयोजना नशामुक्त भारत अभियान र नशामुक्त सिक्किम अभियानको ब्यानरमा सिक्किम राज्य स्थापनाको 50औं वर्षको उपलक्ष्यमा गरिरहेको छ।
क्षेत्र विधायक पामिन लेप्चाले आफ्नो सम्बोधनमा खेलकुदको क्षेत्रमा युवा प्रतिभागीहरूलाई प्रोत्साहन प्रदान गरेकोमा मुख्यमन्त्री एवं यस प्रतियोगिताका प्रमुख संरक्षक प्रेमसिंह तामाङलाई धन्यवाद दिइन्। यसैगरी, उनले आर्चरी एकेडेमी स्थापनाको निम्ति सहयोग गरेकोमा प्रतियोगिताका संरक्षक राज्यसभा सांसद डीटी लेप्चाप्रति पनि कृतज्ञता प्रकट गरिन्।
उनले प्रतिभागीहरूलाई शुभकामना दिँदै इमानदारी, अनुशासन र सम्मानका साथ प्रतिस्पर्धा गर्न प्रोत्साहित गरिन्। उनले खेलकुदको माध्यमबाट लागुऔषधमुक्त, स्वस्थ र प्रगतिशील सिक्किम निर्माण गर्न सामूहिक प्रयासको लागि आह्वान गर्दै सिक्किमलाई सक्षम र समृद्ध राज्य बनाउन सबैलाई आग्रह गरिन्।
प्रतियोगितामा कुल 15 टोलीहरू उपाधिका लागि प्रतिस्पर्धा गरिरहेका छन्, जसमा विजेता टोलीले 3 लाख रूपियॉं र उपविजेता टोलीले 2 लाख रूपियॉं पुरस्कार प्राप्त गर्नेछ।