एसडीएफ अध्यक्ष पवन चामलिङ पोक्सो मामिलामा आरोप मुक्त

गान्तोक, 23 अप्रेल। सिक्किम डेमोक्रेटिक फ्रण्ट (एसडीएफ) पार्टीका अध्यक्ष पवन चामलिङ पोक्सो मामिलामा निर्दोष साबित भएका छन्। उनीमाथि लागेको आरोपलाई जिल्ला अदालतको स्पेशल कोर्टले निरस्त गरिदिएको छ।
एसडीएफ पार्टीले आज जारी एक प्रेस विज्ञप्तिमा यस आसयको जानकारी दिएको छ। वि​ज्ञप्तिमा एसडीएफ अध्यक्षमाथि झुटो र आधारहिन पोक्सो मामिला लगाइएको बताउॅंदै आज जिल्ला अदालतको स्पेशल कोर्टले उक्त मामिलालाई निरस्त गरिदिएको बताइएको छ।
राजनीतिक प्रतिशोधको भावनाले पवन चामलिङमाथि लगाइएको उक्त मुद्दामा प्रतिपक्षले कानूनी तौरमा अपराध सिद्ध गर्न नसकेको एसडीएफले बताएको छ। एसडीएफले भनेको छ, कानूनी तौरमा कुनै अपराध गरेको प्रमाणित हुनको निम्ति अपराधीले त्यो अपराध गर्दा उसको मेन्स रिया प्रमाणित हुनुपर्दछ। यस मामिलामा पवन चामलिङको आफ्नो सम्बोधनमा कुनै अपराध गर्ने सोच अथवा मेन्स रिया नरहेकोले गर्दा अथवा प्रतिपक्षले कुनै पुख्ता दसीप्रमाण पेश गर्न नसकेकोले गर्दा न्यायालयले उक्त मामिलालाई आधारहिन र असत्य ठहर गर्दै यस मामिलाबाट पवन चामलिङलाई मुक्त गरिदिएको छ।
एसडीएफ न्याय प्रक्रिया र न्याय प्रणालीप्रति विश्वास र भरोसा राख्ने पार्टी रहेको बताउॅंदै एसडीएफले यस न्यायपूर्ण निर्णयलाई स्वागत जनाउॅंदै धन्यवाद प्रकट गरेको छ। एसडीएफले राजनीतिक प्रतिशोधको भावनामा गरिने व्यवहारको निन्दा गर्दछ भन्दै आजको यस फैसलाले अदालतको गरिमा बढेको र न्यायालयप्रति आम जनमानसको भरोसा जागेको बताएको छ।