गान्तोक, 10 जून। केन्द्रमा एनडीए सरकार र राज्यमा एसकेएम सरकार दुवैको सरकार गठन दिवसको उपलक्ष्यमा आयोजित ‘विकसित सिक्किमदेखि विकसित भारत@2047’ विषयमा आयोजित दुई दिने कार्यशालाको आज समापन भयो। राजधानीको मनन केन्द्रमा आयोजित कार्यक्रममा मुख्यमन्त्री प्रेमसिंह तामाङ मुख्य अतिथि थिए।
मुख्यमन्त्रीले सिक्किमका जनतालाई फेरि एक पटक एसकेएम पार्टीमाथि विश्वास गरेकोमा हार्दिक आभार व्यक्त गरेका छन्। उनले सिक्किमे जनताको निरन्तर समर्थन विनम्र र अत्यन्त प्रेरणादायी रहेको बताए। उनले राज्यप्रतिको समर्पण र सेवाको लागि सबै सरकारी अधिकारीहरू र कर्मचारीहरूमा पनि हार्दिक कृतज्ञता पनि व्यक्त गरेका छन्।
मुख्यमन्त्रीले सिक्किम राज्य स्थापना भएको 50 गौरवशाली वर्ष मनाउने क्रममा केन्द्र सरकारको निरन्तर र उदार समर्थनप्रति पनि कृतज्ञता व्यक्त गरेका छन्। उनले विशेष गरी महामारी, टिस्टा बाढी, पैह्रो र भूकम्प जस्ता संकटहरूमा केन्द्रको सहयोग राज्यको लचिलोपन र प्रगतिको लागि महत्त्वपूर्ण भएको उल्लेख गरेका छन्।
मुख्यमन्त्रीले सफल शासन टीमवर्कमा निर्भर गर्दछ भन्ने कुरामा आफू विश्वस्त रहेको बताएका छन्। उनले सरकारी कर्मचारीहरू अहंकार वा पूर्वाग्रहबाट मुक्त भएर इमानदारीपूर्वक सेवा गर्नुपर्छ र जनताको कल्याणको लागि निर्देशनहरू तुरुन्तै र इमान्दारीपूर्वक कार्यान्वयन गर्नुपर्छ भनी आह्वान गरेका छन्।
उनले विगत सात वर्षमा वर्तमान सरकारले धेरै उल्लेखनीय उपलब्धिहरू हासिल गरेको बताउॅंदै सरकारी कर्मचारीहरू र जनताको योगदान महत्वपूर्ण रहेको उल्लेख गरेका छन्। उनले हामी सबै मिलेर 2047 सम्ममा विकसित भारतमा एक गौरवशाली योगदानकर्ताको रूपमा विकसित सिक्किम निर्माण गर्न प्रतिबद्ध छौं भनी आज सामाजिक सञ्जालमा उल्लेख गरेका छन्।
