गान्तोक, 13 जुलाई। एसडीएफ अध्यक्ष पवन चामलिङले 211औं भानु जयन्तीको उपलक्ष्यमा सम्पूर्ण नेपालीभाषी महानुभावप्रति हार्दिक शुभकामना र बधाई व्यक्त गरेका छन्।
एसडीएफ अध्यक्ष चामलिङले आज जारी आफ्नो सन्देशमा आदिकवि भानुभक्त आचार्यको भक्ति र आराधनाबाट सबै नेपालीभाषीहरूको शिक्षा र भाषा-ज्ञानको यात्रा प्रारम्भ हुने गरेको बताएका छन्। यसकारण कवि भानुभक्त आचार्यप्रति अगाध श्रद्धा र भक्तिभाव नेपालीभाषीको विशेषता र पहिचान बनेको उनले बताएका छन्। भारतीय नेपालीभाषीमाझ भानुभक्त आचार्य जातीय गौरव हुनुसाथै जातीय एकताका प्रतीक पनि रहिआएको पनि एसडीएफ अध्यक्षले बताएका छन्।
उनले यी महान् विभूतिको जन्मजयन्तीलाई हामीले जातीय पर्वको रूपमा पालन गर्दै आएका छौं, र प्रत्येक वर्ष नेपालीहरू बड़ो धुमधामसँग र जोशपूर्वक यस जयन्तीलाई पर्वस्वरूप मनाइरहेको बताएका छन्। चामलिङले नेपालीभाषी समाजको यो साझा गौरवको दिनमा आदिकवि भानुभक्त आचार्यप्रति हार्दिक श्रद्धा अर्पण गर्दै सबै भाषा-साहित्यप्रेमी महानुभावहरूमा हार्दिक शुभकामना व्यक्त गरेका छन्।
