कलाकार भरोसा सम्मेलनको तेस्रो संस्करण मास्टर क्लास, सम्मान लगायतका विभिन्न कार्यक्रमहरू सहित आयोजना हुने

गान्तोक, 12 मई । सिक्किम कलाकार भरोसा सम्मेलनको तेस्रो संस्करण आगामी 14 र 15 मई, 2026 का दिन राजधानीमा आयोजना हुने भएको छ। उक्त जानकारी सिक्किम कला, संस्कृति एवं धरोहर विकास बोर्डका अध्यक्ष सञ्जय दिलपाली राईले राजधानीमा आज आयोजित एक पत्रकार सम्मेलनमा दिए।
उनले सिक्किम कलाकार भरोसा सम्मेलन अब सरकारी कार्यक्रमको रूपमा आयोजना गरिने निर्णय सबै कलाकारहरूका लागि हर्षको विषय रहेको बताए। उनले मुख्यमन्त्री प्रेमसिंह तामाङ सिक्किमका कलाकारहरूलाई समर्थ बनाउन चाहन्छन् भन्दै सिक्किम कलाकार भरोसा सम्मेलन पनि सोही उद्देश्यपूर्तिको एक भाग रहेको अवगत गराए। उनले कार्यक्रम पहिले 8 र 9 मईमा आयोजना हुने तय भएको थियो, तर मुख्यमन्त्रीको व्यस्तताका कारण 14 र 15 मईमा गरिने भएको बताए।
उनले पहिलो दिन संगीत, नृत्य, फाइन आर्ट्स, फिल्म, थिएटर आदि विधामा स्रोत व्यक्तहरूले मास्टर क्लास सञ्चालन गर्ने जानकारी गराए। सोही दिन सॉंझ कार्यक्रमको औपचारिक उद्घाटन समारोह सम्पन्न गरिने बताए, जसमा स्वास्थ्य मन्त्री जीटी ढुङ्गेल र पूर्व विधायक कृष्ण कुमार राई उपस्थित रहनेछन्। उनले यस पाली कन्टेन्ट क्रिएटर र इन्फ्लुएन्सरहरूलाई कलाकार भरोसा सम्मेलनमा सामेल नगरिएको र उनीहरूका लागि चॉंडै क्रिएटर्स कन्क्लेभ आयोजना गरिने स्पष्ट पारे।
उनले दोस्रो दिनको कार्यक्रममा मुख्यमन्त्री प्रेमसिंह तामाङ मुख्य अतिथिका रूपमा उपस्थित रहने बताए। यस दिन बलीवुडका प्रसिद्ध अभिनेता सोनु सुदको विशेष उपस्थिति रहने र राज्यका कलाकारहरूलाई सम्बोधन गर्ने उनले बताए।
यस अघि सांस्कृतिक प्रकोष्ठका उपाध्यक्ष डा. मनोज राईले कार्यक्रममा दुई वर्गमा कलाकारहरूलाई अभिनन्दित गरिने जानकारी गराए। यसैगरी, सम्मेलनकी मुख्य संयोजक सुष्मा छेत्रीले कार्यक्रमलाई सफल बनाउन राज्यका सबै जिल्लामा संयोजकहरू नियुक्त गरिएको जानकारी दिइन्।