36 वर्षीय युवाको हत्याको आरोपमा 76 वर्षीय वृद्ध पक्राउ

गान्तोक, 24 जुलाई। गान्तोकको कृषि भवन परिसरमा गत 22 जुलाई एक 36 वर्षीय युवा कल्याण राई (लेबुङ, दार्जिलिङ) को हत्या भएको मामिला अघि आएको छ। सदर प्रहरीले हत्याको आरोपमा एक 76 वर्षीय पेमा ग्याल्पो लादिङपालाई पक्राउ गरेको छ। घटना 22 जुलाई, 2025 राति करिब 11 बजे आरोपी लादिङपाको घर परिसरमा भएको बताइएको छ। आरोपी अवकासप्राप्त एसीएफ वन विभाग अधिकारी हुन्।
पुलिस स्रोतअनुसार, 22 जुलाई आरोपीले आत्मसमर्पण गर्दै घटनाको जानकारी तादोङ आउटपोस्टमा दिएका थिए। मृतकको टाउको, घॉंटी, छाती, पेट र हातहरूमा धारिलो हतियारको चोट रहेको पाइएको छ। गम्भीर चोटका कारण घटनास्थलमै कल्याण राईको मृत्यु भयो। उनी केही समयदेखि सिक्किममा रोजगारको सिलसिलामा बसेका थिए। आरोपीले आत्मरक्षाको प्रयासमा प्रहार गर्दा हत्या भएको सुत्रबाट जानकारी प्राप्त भएको छ।
आरोपी सदर पुलिस हिरासतमा छन् भने घटनाको सम्बन्धमा भारतीय न्याय संहिता, 2023 को धारा 103 अन्तर्गत मुद्दा दर्ता गरिएको छ। कानुनी प्रक्रिया पूरा गरेपछि मृतकको शव बुधवार आफन्तलाई सुम्पिएको छ। घटनासम्बन्धी प्रारम्भिक छानबीनमा मृतकले लगभग तिन घण्टासम्म दैलो ढकढक्याउनुका साथै हल्ला गरेर आरोपीलाई दु:ख दिएको र दैलो खोलेर हेर्दा उक्त मृतकले धारिलो छुराले आरोपीमाथि हमला गरेको आरोप छ। आरोपीले आत्मरक्षामा हमला गर्दा कल्याण राईको हत्या भएको आरोपीको बयान रहेको बताइएको छ।
अर्कोतिर, आरोपीको बयानमा मात्र सिमित नरहेर पुलिसले गहिरो छानबीन गरिरहेको आश्वासन दिएको छ। घटनाको सम्बन्धमा सिक्किम पुलिसले आज सदर थानामा पत्रकार सम्मेलन गरि आधिकारिक बयान दिएको छ। यस मामिलालाई पुलिसले निष्पक्षताका साथ अघि बढाई काम गर्ने आश्वासन दिएको छ।
गान्तोक जिल्ला पुलिस अधीक्षक महिन्द्र सुब्बा, एएसपी कर्मा छिरिङ भोटिया, डीएसपी मिङ्ग्युर नादिकपा र एसएचओ निरज खतिवाडाले आज पत्रकार सम्मेलन मार्फत घटनाको बारेमा विस्तृत जानकारी दिएका छन्।