एसआईआर: 31 मईसम्म सिक्किममा ७२,१३७ भन्दा धेरै मतदाताहरूलाई गणना फारम बितरित

गान्तोक, 31 मई। सिक्किमका मुख्य निर्वाचन अधिकारी राजकुमार यादव, आईएएसले मतदाता नामावलीको विशेष गहन पुनरीक्षण (एसआईआर) अन्तर्गत गणना चरण राज्यभरि सहज रूपमा अगाडि बढिरहेको बताएका छन्। उनले यो अभ्यास ३० मई, २०२६ मा शुरु भएको र २८ जून, २०२६ सम्म जारी रहने जानकारी गराएका छन्।
मुख्य निर्वाचन अधिकारी यादवले आज जारी प्रेस विज्ञप्तिमा भने, बुथ स्तरीय अधिकारीहरू (बीएलओहरू) ले गणना फारमहरू वितरण गर्न र गणना प्रक्रियामा मतदाताहरूलाई सहयोग गर्न घर-घर भ्रमण गरिरहेका छन्। मतदाताहरूलाई बीएलओहरूसँग सहयोग गर्न र आवश्यक जानकारी समयमै पेश गर्न अनुरोध गरिएको छ। उनले ३१ मई, २०२६ सम्म लगभग ७२,१३७ मतदाताहरू (राज्यको कुल मतदाताको १५.३२%) लाई गणना फारम वितरण गरिएको जानकारी गराएका छन्।
उनले मतदाताहरूका सहजीकरण उपायको रूपमा भारतको निर्वाचन आयोगले मतदाता पोर्टलमार्फत ओडिशा, मिजोरम, सिक्किम र मणिपुरका मतदाताहरूका लागि गणना फारमहरू अनलाइन पेश गर्न सक्ने सुविधा उपलब्ध गराएको बताएका छन्। योग्य मतदाताहरूले मतदाता सेवा पोर्टल मार्फत आफ्नो गणना फारमहरू अनलाइन पेश गर्न सक्छन्। अनलाइन सुविधाका लागि मतदाताहरूको मोबाइल नम्बर ईपीआईसीसँग र मोबाइल नम्बर आधारसँग जोडिएको हुनुपर्छ भने आधार र ईपीआईसी डाटाबेसमा उनीहरूको नाम मेल खाएको हुनुपर्नेछ।
मुख्य निर्वाचन अधिकारीले एसआईआर स्वच्छ, सटीक र समावेशी मतदाता नामावली सुनिश्चित गर्ने उद्देश्यले गरिएको एक महत्त्वपूर्ण अभ्यास रहेको जनाएका छन्। उनले जिल्ला निर्वाचन अधिकारीहरू, निर्वाचन दर्ता अधिकारीहरू र बुथ स्तरीय अधिकारीहरूलाई गणना प्रक्रियाको प्रगतिलाई नजिकबाट निगरानी गर्न र यसको प्रभावकारी कार्यान्वयनलाई सहज बनाउन निर्देशन दिइएको छ।
यादवले राज्यका सबै योग्य मतदाताहरूलाई यस अभ्यासमा सक्रिय रूपमा भाग लिन र निर्धारित अवधिभित्र गणना प्रक्रिया पूरा गर्न अपील गरेका छन्।