वीर शहीदहरूको सम्झनामा शहीद दिवस पालन गरियो

गान्तोक, 30 जनवरी । देशका लागि आफ्नो प्राणको आहुति दिने वीर शहीदहरूको सम्झनामा आज बिहान राज्यव्यापी रूपमा शहीद दिवस पालन गरियो। यस अवसरमा बिहान ११:०० बजीदेखि ११:०२ बजीसम्म सम्मान स्वरुप देशभरि नै दुई मिनेट मौनधारण गरियो। यस क्रममा मुख्यमन्त्री प्रेमसिंह तामाङले पनि आफ्नो सवारीसाधन रोकेर दुई मिनेट मौनधारण गर्दै देशका वीर शहीदहरूप्रति श्रद्धाञ्जली अर्पण गरेका थिए। उनले स्वतन्त्रता सेनानीहरूले दिएको सर्वोच्च बलिदानको सम्मान तथा ऐक्यबद्धताको प्रतीकका रूपमा यो भावपूर्ण श्रद्धाञ्जली व्यक्त गरेको सीएमओले बताएको छ। यसैगरी आज बिहान राजधानीको टाशीलिङ सचिवालयमा पनि शहीद दिवस श्रद्धापूर्वक पालन गरियो। गृह विभागकी प्रोटोकल सचिव बेनु गुरुङले सचिवालय परिसरमा विभिन्न विभागका अधिकारी तथा कर्मचारीहरूलाई दुई मिनेट मौनधारण गराइन्।प्रत्येक वर्ष 30 जनवरीमा शहीद दिवस मनाइन्छ। भारतको स्वतन्त्रता संग्रामका शहीदहरूको बलिदानको स्मरणमा सो दिवस पालन गरिन्छ । यो दिन राष्ट्रपिता महात्मा गान्धीको पुण्यतिथिसँग पनि सम्बन्धित छ र सत्य तथा अहिंसाका उनका आदर्शहरू सम्झना गराउने दिन पनि हो।