पहिलो राज्यस्तरीय खो-खो च्याम्पियनशिप 2026 सम्पन्न

गान्तोक, 05 अप्रेल। सिक्किम खो-खो एसोसिएशनद्वारा आयोजित पहिलो राज्यस्तरीय खो-खो च्याम्पियनशिप 2026 आइतवार रेशिथाङको खेलगाउँमा भव्य समापन समारोह र पुरस्कार वितरण कार्यक्रमसँगै सम्पन्न भएको छ। 3 अप्रेलमा शुरु भएको उक्त च्याम्पियनशिपको समापन समारोह र पुरस्कार वितरण कार्यक्रममा क्षेत्र विधायक तथा ग्रामीण विकास विभागकी सल्लाहकार कला राई उपस्थित रहेकी थिइन्।
कार्यक्रमलाई सम्बोधन गर्दै मुख्य अतिथिका रूपमा रहेकी विधायक कला राईले पहिलो राज्यस्तरीय खो-खो च्याम्पियनशिप सफलतापूर्वक सम्पन्न गरेकोमा आयोजकहरूलाई बधाई दिइन्। खेलकुदको महत्त्वमाथि रेखाङ्कित गर्दै राईले खो-खो खेल मात्र नभएर सहनशीलता, सामूहिक कार्य र उपस्थिति निर्माण गर्ने खेल भएको बताइन्। उनले च्याम्पियनशिपभरि सहभागीहरूले देखाएका उत्साह र कौशलले सिक्किमका युवा पुस्ताको बढ्दो खेलकुद क्षमतालाई प्रतिबिम्बित गर्ने धारणा व्यक्त गरिन्।
राईले खेलकुद पूर्वाधार र अवसरहरूको सन्दर्भमा राज्यले धेरै लामो यात्रा तय गरेको उल्लेख गरिन् र भविष्यका च्याम्पियनहरू तयार पार्न यस्ता विकासहरूको पूर्ण उपयोग गर्नुपर्ने बताइन्। विधायक राईले बालकबालिकाको समग्र विकासका लागि नियमित शारीरिक गतिविधि आवश्यक रहेको बताउँदै विद्यालय जीवनमा खेलकुदलाई अझ सक्रिय रूपमा समावेश गर्नुपर्ने आवश्यकतामा जोड़ दिइन्।
विधायक राईले मुख्यमन्त्री पीएस गोलेको नेतृत्वमा राज्य सरकारले खेलकुद प्रवर्द्धन, युवा विकास र राम्रो पूर्वाधार निर्माणमा उल्लेखनीय ध्यान दिइरहेको बताइन्, फलस्वरूप आकाङ्क्षी खेलाड़ीहरूका लागि व्यापक अवसरहरू खोलिएका छन्। आफ्नो सम्बोधनको अन्त्य गर्दै उनले सबै सहभागीलाई इमानदारी र दृढ़ सङ्कल्पका साथ कड़ा परिश्रम गर्न प्रोत्साहित गरिन् र धेरै युवा खेलाड़ीले सिक्किम र देशको प्रतिनिधित्व उच्च स्तरको प्रतिस्पर्धामा गर्ने बताइन्।
सब-जुनियर महिला विधामा सोरेङ जिल्ला विजयी बन्यो भने मङ्गन जिल्लालाई उपविजेता घोषित गरियो। सब-जुनियर पुरुष वर्गमा मङ्गन जिल्ला विजेता घोषित भयो। अर्कोतिर, नाम्ची जिल्ला उपविजेता घोषित भयो। सिनियर पुरुष समूहमा सोरेङ जिल्ला उपाधि जित्न सफल बन्यो। मङ्गन जिल्लालाई उपविजेता घोषित गरियो। सिनियर महिलाहरूको समूहमा मङ्गन जिल्ला च्याम्पियन घोषित भयो। त्यसैगरी नाम्ची जिल्ला उपविजेता बन्यो।