सरकारले गान्तोक शहर बाहेक अन्य ठाउॅंहरूमा अड-इभन प्रतिबन्ध फिर्ता लियो, सरकारी वाहनहरूमा जारी रहने

गान्तोक, 31 मई। सिक्किम सरकारले राज्यमा निजी वाहनहरूको चलाचलमा लागू गरेको अड-इभन प्रतिबन्ध फिर्ता लिएको छ। यद्यपि, गान्तोक शहरमा उक्त प्रतिबन्ध लागू रहनेछ भने राज्यका अन्य जिल्लाहरूमा लगाइएको प्रतिबन्ध तत्काल प्रभावका साथ फिर्ता लिइएको छ।
सिक्किम सरकारको गृह विभागले आज जारी गरेको एक अधिसूचनामा उक्त जानकारी दिइएको छ। अधिसूचनामा भनिएको छ, राज्यमा मोटर स्पिरिट र हाई स्पीड डिजेलको बफर स्टकको उपल​ब्धता निश्चित गर्न समीक्षा गरिएको थियो भने राज्य खाद्य एवं नागरिक आपूर्ति विभागले वर्तमान आवश्यकताहरूलाई पूरा गर्न प्रयाप्त बफर स्टक तयार गरेको संकेत दिएको छ। यस विषयलाई ध्यानमा राख्दै सरकारले पहिले जारी गरिएको अधिसूचनामा आंशिक संशोधन गर्दै गान्तोक शहर बाहेक राज्यका अन्य जिल्लाहरूमा लागू गरिएको अड-इभन प्रतिबन्ध फिर्ता लिने निर्णय गरेको जनाएको छ।
अधिसूचनामा सरकारी वाहनहरूलाई लिएर लागू गरिएको अड-इभन प्रतिबन्ध पनि जारी रहने उल्लेख छ।
उल्लेखनीय छ, इरान र अमेरिकाबीच जारी संघर्षका कारण उत्पन्न स्थितिलाई ध्यानमा राख्दै सिक्किम सरकारले मितव्ययिता उपायहरूका रूपमा राज्यव्यापी रूपमा निजी वाहनहरूको चलाचलमा प्रतिबन्ध लगाएको थियो। सरकारको उक्त निर्णयको विपक्षी राजनीतिक दलहरूले निकै विरोध जनाए। यो मामिला सिक्किम उच्च न्यायालयसम्म पुग्यो।
सिक्किम उच्च न्यायालयले एउटा पीआईएलमाथि सुनवाई गर्दै अड-इभन प्रतिबन्धका कारण जनसाधारणले झेल्नु परिरहेका समस्याहरूबारे सरकारलाई रिपोर्ट बुझाउन निर्देश दिएको थियो।