ब्याडमिन्टन एसोसिएशन अफ् सिक्किमको ३५औं वार्षिक साधारण सभा सफलतापूर्वक सम्पन्न

गान्तोक, 18 मई। ब्याडमिन्टन एसोसिएशन अफ् सिक्किम (बीएएस) को ३५औं वार्षिक साधारण सभा आइतबार गान्तोकको देवरालीस्थित स्थानीय एउटा होटल सम्पन्न भयो। सभामा बीएएसका पदाधिकारीहरू, आजीवन सदस्यहरू, सम्बद्ध जिल्ला संघहरू र आमन्त्रित विशिष्ट व्यक्तिहरूको उपस्थिति रहेको थियो। उक्त जानकारी बासले सोमवार जारी एक प्रेस विज्ञप्तिमा दिएको छ।
सभालाई सम्बोधन गर्दै बास अध्यक्ष जेकब खालिङले २०२५-२६ को अवधिमा राज्यमा ब्याडमिन्टनको उल्लेखनीय प्रगति र उपलब्धिहरूमाथि प्रकाश पारे। सिक्किमभर ब्याडमिन्टनको प्रवर्द्धन र विकासका लागि गरिएका निरन्तर प्रयासहरूको सभाले सराहना गरेको बताइएको छ।
यसैगरी, बासका महासचिव सुकान्त दासले २०२५-२६ को वार्षिक प्रतिवेदन प्रस्तुत गरे कोषाध्यक्ष कर्मा भोटियाले सोही अवधिको वार्षिक वित्तीय प्रतिवेदन सदनमा प्रस्तुत गरे। विस्तृत छलफलपछि दुवै प्रतिवेदन सर्वसम्मतिले पारित गरियो। सभामा ब्याडमिन्टन पूर्वाधारको विकास, खेलाडीहरूको कल्याण, तृणमूल स्तरमा कार्यक्रम, प्रतियोगिता व्यवस्थापन र सम्बद्ध जिल्ला एकाइहरूको सुदृढीकरण सम्बन्धी विभिन्न महत्त्वपूर्ण एजेन्डाहरूमा पनि छलफल गरियो।
सभाको प्रमुख आकर्षण नोभेम्बर २०२६ मा सिक्किममा जुनियर राष्ट्रिय ब्याडमिन्टन च्याम्पियनशिपको आगामी आयोजनाको बारेमा छलफल थियो। बासले प्रतिष्ठित राष्ट्रिय कार्यक्रमलाई भव्य रूपमा सफल बनाउन सामूहिक रूपमा काम गर्ने संकल्प गरेको छ। वार्षिक साधारण सभाले भारतीय ब्याडमिन्टन संघका अध्यक्ष तथा असमका मुख्यमन्त्री हिमन्त बिस्व सरमा र महासचिव संजय मिश्रालाई यो प्रतिष्ठित प्रतियोगिताको आयोजकको रूपमा सिक्किमलाई मनोनित गरेकोमा कृतज्ञता व्यक्त गर्यो।
यस अतिरिक्त, सभामा सम्बद्धता मामिला, दर्ता नवीकरण, प्रशासनिक समन्वय सुदृढीकरण र राज्य तथा राष्ट्रिय वरीयता प्रतियोगिताहरूमा सहभागिता बढाउने विषयमा रचनात्मक छलफल पनि भएको बताइएको छ। बासले सिक्किमका मुख्यमन्त्री, जो बीएएसका प्रमुख संरक्षक पनि हुन्, लाई उनको बहुमूल्य मार्गदर्शन र अटल समर्थनको लागि तथा खेल मन्त्री राजु बस्नेतलाई निरन्तर सहयोगका लागि हार्दिक आभार व्यक्त गरेको छ।
बासले संघकी वरिष्ठ उपाध्यक्ष छिरिङ पाल्देन भोटियालाई गान्तोक नगर निगमको मेयरको रूपमा निर्वाचित भएकोमा अभिनन्दन गर्यो। यसरी नै सभाले प्रतिष्ठित ब्याडमिन्टन एसोसिएशन अफ् इण्डियाको राष्ट्रिय खेल नियन्त्रक परीक्षा २०२५ सफलतापूर्वक उत्तीर्ण गरेकोमा एड्रिएल ग्याम्त्सो लिङ्दोङलाई पनि सम्मानित गर्यो। दुई प्रतिष्ठित व्यक्तित्वहरूलाई उनीहरूको उल्लेखनीय उपलब्धि र योगदानका लागि सम्मानित गरिएको बासले आज जारी एक प्रेस विज्ञप्तिमा बताएको छ।