युक्सोममा ६२ परिवार भाजपामा सामेल भएको दाबी

गान्तोक, 02 जून । सिक्किममा भारतीय जनता पार्टी (भाजपा) को संगठनात्मक विस्तारलाई थप बल प्रदान गर्दै आज गेजिङ जिल्लाको युक्सोममा आयोजित एक कार्यक्रममा ६२ परिवार औपचारिक रूपमा भाजपा प्रवेश गरेका छन्। उक्त कार्यक्रम भाजपा सिक्किम प्रदेश अध्यक्ष डीआर थापाको संगठनात्मक भ्रमणका अवसरमा सम्पन्न भएको प्रेस विज्ञप्तिमा उल्लेख छ।यस भ्रमणमा प्रदेश उपाध्यक्ष एनके सुब्बा, महासचिव दिनेश चन्द्र नेपाल, वरिष्ठ पार्टी पदाधिकारीहरू, गेजिङ जिल्ला अध्यक्ष डिगुम लिम्बू, मण्डल अध्यक्ष किन्जाङ शेर्पा भोटिया तथा जिल्लाका अन्य पार्टी कार्यकर्ताहरू सहभागी थिए।कार्यक्रमलाई सम्बोधन गर्दै प्रदेश अध्यक्ष थापाले भाजपा सरकारद्वारा सञ्चालन गरिएका विभिन्न जनकल्याणकारी योजना तथा विकास कार्यक्रमहरूको बारेमा जानकारी गराए। उनले पार्टीका सदस्यहरू तथा नयाँ प्रवेश गरेका परिवारहरूलाई सिक्किमका जनताको सशक्तीकरण र समग्र विकासका लागि एकताबद्ध भएर काम गर्न आह्वान गरे।प्रदेश उपाध्यक्ष सुब्बाले नयाँ प्रवेश गरेका सदस्यहरूलाई पार्टीमा स्वागत गर्दै राज्यभर भाजपा संगठनको वर्तमान अवस्था तथा सञ्चालन भइरहेका गतिविधिहरूबारे जानकारी दिए।मण्डल अध्यक्ष भोटियाले पनि सभालाई सम्बोधन गर्दै निर्वाचन क्षेत्र स्तरमा पार्टीका गतिविधि तथा संगठनात्मक अवस्थाबारे प्रकाश पारेका थिए।कार्यक्रममा प्रदेश अध्यक्ष थापाले क्षेत्रका योग्य लाभार्थीहरूलाई आयुष्मान कार्ड तथा ई-श्रम कार्ड वितरण गरे। यसबाट लाभार्थीहरूले आयुष्मान भारत योजनाअन्तर्गत रु. ५ लाखसम्म निःशुल्क स्वास्थ्य उपचार सुविधा तथा ई-श्रम योजनाअन्तर्गत विभिन्न सामाजिक सुरक्षा लाभ प्राप्त गर्न सक्ने बताइएको छ।यसअघि भ्रमणको शुरुवात सिक्किमको ऐतिहासिक प्रथम राजधानी युक्सोमस्थित पवित्र नोर्बुगाङ गुम्बामा पूजा-अर्चना गरी गरिएको थियो। भाजपा सिक्किमले यस भ्रमणलाई सफल ठहर गर्दै ६२ परिवारको सामूहिक पार्टी प्रवेशले सिक्किममा भाजपाप्रति बढ्दो जनसमर्थन र विश्वासलाई प्रतिबिम्बित गरेको दाबी गरेको छ।