एसडीएफको याङथाङ निर्वाचन क्षेत्रमा समष्टिस्तरिय सभा सम्पन्न

गान्तोक, 30 जुलाई। सिक्किम डेमोक्रेटिक फ्रण्ट (एसडीएफ) पार्टीको गेजिङ जिल्ला अन्तर्गत याङथाङ निर्वाचन क्षेत्रमा समष्टिस्तरिय सभा सम्पन्न भएको छ। उपाध्यक्ष प्रशासन पीएस लिम्बूको अध्यक्षतामा सम्पन्न भएको उक्त सभामा उपाध्यक्ष प्रभारी गेजिङ जिल्ला कर्मा वाङ्चुक लेप्चा, गेजिङ जिल्ला अध्यक्ष दिपेन गुरुङ, सोरेङ जिल्ला अध्यक्ष महेन्द्र लिम्बू, उपाध्यक्ष युवा प्रभारी इजाक लिम्बू आदि उपस्थिति थियो।कार्यक्रममा वक्ताहरूले एसकेएम सरकारमाथि जनताको खुशी खोस्नुका साथै जनताको हक, अधिकार र पहिचानसम्म मासिसकेको आरोप लगाए। उनीहरूले सिक्किमको श्रीसम्पत्ति, जमिन, धरोहर र राजस्व आउने सरकारको इक्विटी सेयरसमेत बेचिखाएको आरोप लगाए।वक्ताहरुले दाबी गर्दै भने, पूर्व एसडीएफ सरकारमा जम्मा ६१ हजार करोडको बजेटले जनतालाई सुख-शान्ति र अनेकौं सहुलियत प्रदान गर्नुका साथै भौतिक पुर्वाधारमा पनि अकल्पनीय छलाङ लगाएको थियो। तर, एसकेएम सरकारले ७ वर्षको अवधीमा एकलाख करोड़भन्दा ज्यादा बजेट पास गरेको छ भने ४० हजार करोड़भन्दा ज्यादा ऋण ल्याएर पनि सिक्किम आर्थिक रूपमा सुकौरोमा परेको छ। एसडीएफले भनेको छ, एसकेएम सरकार गरीब बिरोधी सरकार हो। सिक्किम बिरोधी सरकार हो। त्यसैले यो सरकारलाई जरैदेखि उखेलेर फ्याक्न अब जनता आफै बोल्नुपर्छ। आफै युद्ध लड्नुपर्छ र आफै आफ्नो सरकार बनाउनुपर्छ। अब फेरि एसडीएफ सरकार बनाएर सिक्किमको सह फर्काउनु पर्छ। एसडीएफले अब धारावाहिक रुपमा पश्चिम सिक्किमका आठैवटा निर्वाचन क्षेत्रमा सभा राखिने प्रेस विज्ञप्तिमा जानकारी गरााएको छ।