१३औं उत्तर पूर्व क्षेत्रीय सुटिङ च्याम्पियनशिपमा सिक्किमको ऐतिहासिक उपलब्धि, दुई खेलाडी राष्ट्रिय सुटिङ च्याम्पियनशिपका लागि छनोट

गान्तोक, 30 अगस्त। सिक्किम सरकारको खेलकुद तथा युवा मामिला विभागसँग सम्बद्ध सिक्किम राइफल एसोसिएशनले असममा आयोजित ‘१३औं उत्तर पूर्व क्षेत्रीय सुटिङ च्याम्पियनशिप २०२६’ मा ऐतिहासिक उपलब्धि हासिल गरेको छ। यस च्याम्पियनशिपमा सिक्किमका दुई खेलाडीले उत्कृष्ट प्रदर्शन गर्दै प्रतिष्ठित ६९ औं राष्ट्रिय सुटिङ च्याम्पियनशिप २०२६ को लागि छनोट भएका छन्।
सिक्किम राइफल एसोसिएशनका अनुसार, च्याम्पियनशिपमा सिक्किमका जम्मा ११ खेलाडीहरूले एयर वेपन इभेन्ट्समा भाग लिएका थिए, जसमा ८ पिस्टल शूटर र ३ राइफल शूटर थिए। खेलाडीहरूले क्षेत्रीय स्तरमा दृढ संकल्प, अनुशासन र खेलकुद उत्कृष्टताका साथ सिक्किमको प्रतिनिधित्व गरे।
एसोसिएशनले च्याम्पियनशिपमा अनु छेत्रीले 10 मिटर एयर पिस्टल र छिरिङ याङ्देन भोटियाले 10 मिटर एयर राइफल स्पर्धामा उत्कृष्ट प्रदर्शन गर्दै ६९ औं राष्ट्रिय सुटिङ च्याम्पियनशिप २०२६ को लागि स्थान पक्का गरेको बताएको छ। उनीहरूको छनोट सिक्किमको युवा सुटिङ प्रतिभाको लागि एक महत्वपूर्ण उपलब्धि रहेको र राज्यमा प्रतिस्पर्धात्मक सुटिङको बढ्दो स्तरको प्रतीक रहेको बताइएको छ।
यस अतिरिक्त, लक्ष्मण अधिकारीले मास्टर मेन्स 10 मिटर एयर पिस्टल व्यक्तिगत प्रतिस्पर्धामा कांस्य पदक हासिल गरे। यो पदकको विशेष महत्व छ, किनकि यो सिक्किमले उत्तरपूर्वी क्षेत्रीय स्तरमा सुटिङमा जितेको पहिलो पदक हो, जुन सिक्किम सुटिङ खेलको इतिहासमा एउटा गौरवशाली अध्याय रहेको एसोसिएशनले बताएको छ।
सिक्किम राइफल एसोसिएशनले सबै प्रतिभागी खेलाडीहरू, प्रशिक्षकहरू, अधिकारीहरू, अभिभावकहरू र समर्थकहरूप्रति हार्दिक बधाई व्यक्त गरेको छ। एसोसिएशनले राज्यमा सुटिङ खेललाई प्रोत्साहित गर्न राज्य खेलकुद विभागले प्रदान गरिरहेको निरन्तर समर्थन र मार्गदर्शनको निम्ति पनि आभार प्रकट गरेको छ।