एसडीएफको पोक्लोक-कामराङमा सांगठनिक सुदृढीकरण सभा सम्पन्न, नयाँ पदाधिकारी चयन

गान्तोक, 10 अगस्त। सिक्किम डेमोक्रेटिक फ्रन्ट (एसडीएफ) पार्टीले पोक्लोक-कामराङ क्षेत्रमा सांगठनिक सुदृढीकरण तथा विस्तारसम्बन्धी महत्वपूर्ण सभा नाम्चीस्थित जिल्ला पार्टी कार्यालयमा सम्पन्न गरेको छ। एसडीएफका केन्द्रिय महासचिव ईश्वर प्रसाद राईको अध्यक्षतामा सम्पन्न सभामा क्षेत्रीय संगठनलाई थप सशक्त, प्रभावकारी तथा जनमुखी बनाउने विषयमा विस्तृत छलफल गरिएको थियो। साथै, पार्टीको सांगठनिक गतिविधिलाई तल्लो तहसम्म विस्तार गर्ने विषयमा पनि छलफल भएको आज जारी प्रेस विज्ञप्तिमा जनाइएको छ।सभामा विभिन्न पदमा नयाँ पदाधिकारीहरू चयन गरिएको छ। यसअघि नै समष्टिस्तरीय समितिको अध्यक्षमा शरद साई राई चयन भइसकेका थिए। सोमबारको सभाले बीबी सुब्बा र कृष्ण कुमार छेत्रीलाई उपाध्यक्ष, खगेन राईलाई महासचिव, विनोद जोगीलाई युवा प्रभारी तथा जोन राईलाई उपप्रभारी चयन गरेको छ। त्यसैगरी, सल्लाहकार तथा पञ्चायत प्रकोष्ठको जिम्मेवारीका लागि मदन राई, ईश्वर प्रसाद राई र विजय राईलाई चयन गरिएको पार्टीले जनाएको छ।सभालाई सम्बोधन गर्दै जिल्ला कार्यकारी अध्यक्ष रमेश किरातले एसडीएफ पार्टी सिक्किम र सिक्किमे जनताको हितमा काम गर्ने पार्टी रहेको दाबी गरे। उनले सिक्किमको सुरक्षा तथा उन्नतिका लागि एसडीएफ प्रतिबद्ध रहेको बताउँदै जनताले आफ्नो हितमा काम गर्ने राजनीतिक शक्तिलाई समयमै पहिचान गरी छनोट गर्नुपर्नेमा जोड दिए। उनले अन्य राजनीतिक दलहरू सिक्किमे जनताको हितमा नरहेको आरोप लगाउँदै राज्यको भविष्यका लागि जनता सचेत हुनुपर्ने बताए।सभामा उपस्थित जिल्ला नेतृत्वले नवनिर्वाचित पदाधिकारीहरूलाई बधाई तथा शुभकामना दिँदै संगठनलाई गाउँ-गाउँसम्म सुदृढ़ बनाउन, जनतासँग निरन्तर सम्पर्क विस्तार गर्न तथा पार्टीका सिद्धान्त, नीति र कार्यक्रमलाई प्रभावकारी रूपमा अघि बढाउन आह्वान गरे।सभाध्यक्ष ईश्वर प्रसाद राईले नवनिर्वाचित सम्पूर्ण पदाधिकारीहरूलाई बधाई तथा शुभकामना व्यक्त गरे।