जैविक राज्यको मान्यता संकटमा पर्न थालेको एसडीएफ किसान मोर्चाको आरोप

गान्तोक, 11 मई। सिक्किम डेमोक्रेटिक फ्रण्ट (एसडीएफ) पार्टीको किसान मोर्चाको क्षेत्र स्तरीय सभा सोमबार नाम्ची जिल्ला अन्तर्गत नामथाङ–रातेपानी निर्वाचन क्षेत्रको फोङला गाउँमा सम्पन्न भयो। पार्टीको क्षेत्रीय संयोजक लाक्पा तामाङको अध्यक्षतामा बसेको सभामा क्षेत्रका प्रगतिशील कृषकवर्ग लगायत अन्य क्षेत्रका कृषकहरूको उपस्थिति रहेको थियो।
जिल्ला कार्यकारिणी समितिको तर्फबाट जिल्ला सभापति रमेश किरात, प्रशासनिक उपसभापति एमबी गुरुङ, जिल्ला सचिव प्रकाश कुमार राई, पार्टी प्रवक्ता योजना खालिङ, विद्यार्थी संघका संयोजक खगेन कुलुङ तथा युवा संयोजक सुमन चामलिङ उपस्थित थिए।
सभामा वक्ताहरूले आ–आफ्नो धारणा राख्दै सिक्किममा जैविक कृषिको शुरुआत एसडीएफ पार्टी तथा पवन चामलिङको दुरदर्शी नेतृत्वको परिणाम हाे भनी बताए। वक्ताहरूले पवन चामलिङकै सरकारकालमा सिक्किम संसारको प्रथम जैविक राज्य बनेको बताउॅंदै यस उपलब्धिलाई सिक्किमले निरन्तरता दिइरहनु पर्ने आवश्यकतामा जोड दिए। उनीहरूले जैविक कृषि पेशामार्फत सिक्किमको समाजलाई स्वावलम्बी र आत्मनिर्भर बनाउन सकिने विश्वास व्यक्त गरे।
यसका साथै, वर्तमान एसकेएम सरकारको गलत नीतिका कारण सिक्किमले प्राप्त गरेको जैविक राज्यको मान्यता समेत संकटमा पर्न थालेको भन्दै वक्ताहरूले चिन्ता व्यक्त गरे। हालसम्म ग्वालाहरूले पाउँदै आएको प्रोत्साहन रकम समेत सरकारले उपलब्ध गराउन नसकेको विषयमा पनि वक्ताहरूले गम्भीर चिन्ता व्यक्त गरेको प्रेस विज्ञप्तिमा उल्लेख छ।
गाउँ-बस्तीमा मकै खेतीलाई किरा लागेर ठूलो क्षति भइरहेको अवस्थामा सरकारले कृषि तथा बागबानी क्षेत्रप्रति आवश्यक ध्यान नदिइ केवल मनोरञ्जनतर्फ जनताको ध्यान मोड्ने काम गरिरहेको पनि वक्ताहरूले आरोप लगाए। सभाले क्षेत्रभरि जैविक कृषिसम्बन्धी जनचेतना तथा जागरूकता आयोजना गर्ने उद्देश्यले दुईजना सदस्य चयन गरेको बताइएको छ।