दिव्याङ्ग बालबालिकाका लागि विशेष विद्यालय निर्माणका लागि एमओयूमा हस्ताक्षर

गान्तोक, 24 फरवरी । गान्तोक जिल्लाका जिल्लापालको कार्यालयमा आज दिव्याङ्ग बालबालिकाका लागि विशेष विद्यालय निर्माणका लागि समझदारी पत्र (एमओयू) मा हस्ताक्षर समारोह सम्पन्न भयो। एनएचपीसीका कार्यकारी निर्देशक जितेन्द्र कुमार र जिल्लापाल तुषार निखारेको उपस्थितिमा एनएचपीसी लिमिटेड, टिस्टा-५ पावर स्टेशन र गान्तोकका जिल्लापालबीच एमओयूमा हस्ताक्षर गरिएको छ।
जानकारी अनुसार, आर्थिक वर्ष २०२५-२६ को लागि कर्पोरेट सामाजिक उत्तरदायित्व (सीएसआर) र दिगो विकास पहल अन्तर्गत परियोजनाको कुल वित्तीय खर्च ६६०.५५ लाख रूपियॉं अनुमान गरिएको छ। भारतमा सीएसआर कम्पनी ऐन, २०१३ अन्तर्गत एक वैधानिक दायित्व हो र कर्पोरेट मामिला मन्त्रालयद्वारा अनुगमन गरिन्छ। निर्धारित वित्तीय मापदण्ड पूरा गर्ने कम्पनीहरूले आफ्नो एभरेज नेट प्रफिटको कम्तिमा २ प्रतिशत सीएसआर गतिविधिहरूमा विनियोजन गर्नुपर्नेछ, जुन शिक्षा, स्वास्थ्य सेवा, पर्यावरणीय दिगोपना, ग्रामीण विकास र समाजका विपन्न वर्गहरूलाई सहयोग जस्ता क्षेत्रहरूमा खर्च गरिन्छ।
प्रस्तावित विशेष विद्यालयले दिव्याङ्ग बालबालिकाहरूका लागि पहुँचयोग्य सुविधाहरूको मध्यमद्वारा जिल्लामा समावेशी शिक्षा पूर्वाधारलाई उल्लेखनीय रूपमा बढाउने अपेक्षा गरिएको छ। राज्यमा दिव्याङ्ग व्यक्तिहरूका लागि कल्याणकारी उपायहरू र पूर्वाधारलाई अझ बलियो बनाउन मुख्यमन्त्री प्रेमसिंह तामाङको नेतृत्वमा यो परियोजनाको नेतृत्व भइरहेको बताइएको छ।