मुख्यमन्त्रीले नेपाली साहित्य परिषद् सिक्किमको नवनिर्वाचित कार्यकारी समितिलाई बधाई दिए

गान्तोक, 23 फरवरी । मुख्यमन्त्री प्रेमसिंह तामाङले नेपाली साहित्य परिषद् सिक्किमको नवनिर्वाचित कार्यकारी समितिलाई हार्दिक बधाई दिॅंदै सरकार साहित्यिक, सांस्कृतिक, सामाजिक, परोपकारी तथा रचनात्मक संघ-संस्थाहरूलाई निरन्तर सहयोग र साथ दिन प्रतिबद्ध रहेको बताएका छन्।मुख्यमन्त्री तामाङले आज सामाजिक सञ्जाल फेसबुक पोस्टमा नेपाली साहित्य परिषद् सिक्किमका अध्यक्षका रूपमा लगातार दोस्रो कार्यकालका लागि पुनः निर्वाचित भएका हरि ढुङ्गेललाई हार्दिक बधाई तथा शुभकामना व्यक्त गरेका छन्। उनले ढुङ्गेलको पुनः निर्वाचनले परिषद्का सदस्यहरूले उनको नेतृत्वप्रति राखेको विश्वास, आस्था र भरोसालाई स्पष्ट प्रतिबिम्बित गरेको बताएका छन्। साथै, यो उनले राज्यको साहित्यिक समुदायप्रति पुर्याएको समर्पित सेवाको उच्च कदर पनि रहेको उल्लेख गरेका छन्।मुख्यमन्त्रीले उपाध्यक्षद्वय रत्न लुक्सम सुब्बा र नीलम न्योपाने, महासचिव भीम रावत, कोषाध्यक्ष जीएस सुब्बा तथा नव निर्वाचित सचिवहरू, पदाधिकारीहरू र कार्यकारिणी सदस्यहरू सबैलाई हार्दिक बधाई दिएका छन्। उनले निर्वाचित सदस्यहरूका सामूहिक जनादेशले सिक्किममा नेपाली भाषा, साहित्य र संस्कृतिको संरक्षण तथा समृद्धिका लागि नयाँ ऊर्जा र साझा प्रतिबद्धताको संकेत गर्दछ भनी बताएका छन्।मुख्यमन्त्रीले भने, ‘नेपाली साहित्य परिषद् सिक्किमले हाम्रो राज्यको समृद्ध साहित्यिक तथा सांस्कृतिक सम्पदाको संरक्षण, प्रवर्द्धन र संवर्द्धनमा सधैं महत्वपूर्ण भूमिका निर्वाह गर्दै आएको छ।’ ढुङ्गेलले प्रस्तुत गरेका अनुवाद पहल विस्तार गर्ने, लोक साहित्यको संरक्षण तथा प्रवर्द्धन गर्ने र विद्यार्थी तथा युवापुस्तालाई साहित्यिक गतिविधिमा सक्रिय रूपमा सहभागी गराउने दृष्टिकोण समयानुकूल र दूरदर्शी रहेको उनले बताएका छन्। मुख्यमन्त्रीले यस्ता पहलहरूले हाम्रो साहित्यलाई विभिन्न समुदायसम्म विस्तार गर्ने मात्र होइन, हाम्रो परम्परा र सांस्कृतिक मूल्यलाई भावी पुस्तासम्म जीवन्त, गतिशील र सान्दर्भिक बनाइराख्न पनि मद्दत गर्ने विश्वास व्यक्त गरेका छन्।उनले ढुङ्गेलको नेतृत्व र उनको समर्पित टोलीको सक्रियतामा परिषद्ले अझ प्रगति गर्दै सिक्किमभरि साहित्य, संस्कृति र सिर्जनशील अभिव्यक्तिको प्रवर्द्धनमा महत्वपूर्ण उपलब्धि हासिल गर्ने पनि विश्वास व्यक्त गरेका छन्। यसैगर, उनले निर्वाचन प्रक्रियामा सहभागी सम्पूर्ण सदस्यहरूप्रति पनि हार्दिक कृतज्ञता व्यक्त गरेका छन्। उनले भने, ‘हाम्रो सरकार सिक्किमभरिका साहित्यिक, सांस्कृतिक, सामाजिक, परोपकारी तथा सिर्जनात्मक संघ-संस्थाहरूलाई निरन्तर सहयोग र साथ दिने प्रतिबद्धतामा दृढ़ छ। राज्यलाई सांस्कृतिक रूपमा समृद्ध, बौद्धिक रूपमा सशक्त र सिर्जनशीलताले परिपूर्ण बनाउने प्रत्येक रचनात्मक समूहलाई हामी निरन्तर प्रोत्साहन र सहयोग गर्दै जानेछौं।’