गान्तोक, 30 अगस्त। तीन दिवसीय राष्ट्रिय खेल दिवस 2025 समारोहको दोस्रो दिन आज रेशिथाङस्थित खेलो इण्डिया स्टेट सेन्टर अफ् एक्सीलेन्समा विविध खेलकुद गतिविधिहरू सम्पन्न गरियो। राज्य खेलकुद एवं युवा मामिला विकास विभागद्वारा आयोजित यस कार्यक्रममा गान्तोकका विधायक दिले नामग्याल बर्फुङ्गपा मुख्य अतिथि तथा शहरी विकास विभागकी चेयरपर्सन छुङछुङ भोटिया विशिष्ट अतिथि थिइन्।
मुख्य अतिथि विधायक बर्फुङ्गपाले स्वास्थ्य नै धन हो भन्दै शारीरिक तन्दुरुस्ती सबै उपलब्धीहरूको आधार रहेको बताए। उनले सरसफाइलाई जीवनको पद्धतिको रूपमा अपनाउन युवाहरूलाई आग्रह गरे भने लागूपदार्थमुक्त समाज निर्माण गर्न सामूहिक संकल्पको लागि आह्वान गरे। उनले यो युद्ध लागूपदार्थ विरुद्धको हो, र हामी सबै मिलेर समाजलाई यो दुष्टताबाट मुक्त गर्नुपर्छ भनी बताए। उनले मार्गदर्शक सिद्धान्तको रूपमा नम्रता, धैर्य, दृढता र इमानदारीमाथि जोड दिए।
खेलकुद एवं युवा मामिला विभागकी सचिव याङ्छेन डी तामाङले एकता र अखण्डतालाई मार्गदर्शक मूल्यको रूपमा जोड दिँदै रेशिथाङ सिक्किममा बहु-अनुशासन खेलकुद गतिविधिहरूको केन्द्रको रूपमा देखा परेको उल्लेख गरिन्। उनले यो उत्सवले राष्ट्रव्यापी फिटनेस आन्दोलनको हिस्सा रहेको बताउॅंदै युवाहरूलाई विकसित भारत र विकसित सिक्किम अनुरूप स्वस्थ भारत निर्माणमा नेतृत्व, टीमवर्क र लचिलोपनलाई पोषण गर्न आग्रह गरिन्।
बिहानको सत्रमा विशिष्ट प्रशिक्षकहरू द्रोणाचार्य पुरस्कार विजेता एवं बक्सिङकी मुख्य प्रशिक्षक सन्ध्या गुरुङ, आर्चेरी ओलम्पियन छुङ्गदा शेर्पा र एथलेटिक्स कोच टाशी राणाले प्रेरणादायी भाषण दिएका थिए। यस अतिरिक्त, चेस, क्यारम, रिले रेस, टग अफ् वार, पिट्टू आदि प्रतियोगिताहरू सम्पन्न गरिएको थियो। विजेता र उपविजेतालाई पुरस्कार वितरणसॅंग दोस्रो दिनको कार्यक्रम सम्पन्न गरियो।
