सिक्किम एकीकृत मानसिक स्वास्थ्य एवं आत्महत्या रोकथाम रणनीतिमाथि कार्यशाला आयोजित

गान्तोक, 19 मई। राज्यको पहिलो स्थानीयकृत मानसिक स्वास्थ्य रणनीति ‘सिक्किम एकीकृत मानसिक स्वास्थ्य एवं आत्महत्या रोकथाम रणनीति 2025-30’ बारे आज प्रमुख सरकारी सरोकारवालाहरूलाई लिएर राजधानीको चिन्तन भवनमा एक अभिमुखीकरण कार्यशाला आयोजन गरियो। गत 16 मई सिक्किमको राज्य स्थापना दिवसको अवसरमा एकीकृत रणनीतिको आधिकारिक शुरुवातपछि यो कार्यशाला गरिएको हो।
कार्यशाला सिक्किम इन्स्पायर्स कार्यक्रम, स्वास्थ्य तथा परिवार कल्याण विभाग र राज्य योजना तथा विकास विभागद्वारा आयोजित कार्यक्रमको उद्घाटन सत्रमा स्वास्थ्य विभाग मन्त्री जीटी ढुङ्गेल मुख्य अतिथिको रूपमा उपस्थित थिए। मन्त्री ढुङ्गेलले आफ्नो सम्बोधनमा समाजको सबैभन्दा जरुरी चिन्ताको विषय मानसिक स्वास्थ्य र आत्महत्या रोकथामलाई सम्बोधन गर्न सामूहिक कार्यको महत्त्वमाथि जोड दिए।
उनले मानसिक स्वास्थ्य स्वास्थ्य विभागको कार्यक्षेत्र भित्र पर्ने भए पनि अर्थपूर्ण परिणामहरू प्राप्त गर्न विभिन्न विभागहरू र सरोकारवालाहरूको सहयोगात्मक सहभागिता महत्त्वपूर्ण रहेको बताए। उनले सिक्किमको प्राकृतिक सुन्दरता र प्रगतिशील नीतिहरूको बावजुद पनि मानसिक रोग र आत्महत्याका घटनाहरू गहिरो चिन्ताको विषय रहेको उल्लेख गरे। उनले मानसिक स्वास्थ्य चुनौतीहरूको पीडाले राज्यको लगभग हरेक परिवार, विद्यालय र समुदायलाई असर गरिरहेको बताए।
मन्त्रीले सिक्किम एकीकृत मानसिक स्वास्थ्य एवं आत्महत्या रोकथाम रणनीति 2025-30 केवल दस्तावेजमा सीमित हुनुहुॅंदैन भन्दै यसलाई कार्यरूपमा उतार्नुपर्ने कुरामा जोड दिए। उनले यो रणनीति मुख्यमन्त्री प्रेमसिंह तामाङको नेतृत्वमा सामूहिक प्रतिबद्धता रहेको उल्लेख गरे भने दस्तावेजलाई आकार दिने व्यापक परामर्श र अनुसन्धानको पनि प्रशंसा गरे।
उनले सहभागीहरूलाई सक्रिय रूपमा संलग्न बन्न र सक्रिय सहकार्यको लागि विचारहरू प्रदान गर्न आग्रह गरे। उनले मानसिक स्वास्थ्य एक सार्वजनिक स्वास्थ्य मुद्दा मात्र होइन, तर एक सामाजिक र नैतिक चुनौती पनि रहेको बताए। उनले यी प्रयासहरूले राज्यभर मानसिक स्वास्थ्यमा ठोस सुधार ल्याउनेछ भनी विश्वास व्यक्त गरे।