सीएपी सिक्किमले पञ्चायती राज दिवस पालन गऱ्यो

गान्तोक, 24 अप्रेल। सिटिजन एक्सन पार्टी (सीएपी) सिक्किमको अखिल सिक्किम स्थानीय स्वशासन परिषद्को आयोजनामा आज राष्ट्रिय पञ्चायती राज दिवस एक भव्य समारोहका साथ मार्चक, रानीपुलमा आयोजन गरियो। कार्यक्रममा प्रमुख अतिथिको रूपमा पार्टी अध्यक्ष गणेश के. राई उपस्थित थिए।
कार्यक्रममा जम्मू कश्मीरको पहलगाममा आतङ्कवादी हमलामा शहीद भएका पर्यटकहरूको चिर आत्मशान्तिको कामना गर्दै तथा महामहिम धर्म गुरु पोप फ्रान्सिसको निधनप्रति श्रद्धाञ्जली अर्पण गर्दै एक मिनेटको मौन धारण गरियो।
पार्टी अध्यक्ष गणेश के. राईले उपस्थित सम्पूर्ण जनप्रतिनिधिहरूलाई शुभकामना दिँदै पञ्चायती राजको महत्वबारे प्रष्ट विचार राखे। उनले सीएपी सरकार बनेको दिन ग्राम पञ्चायतलाई सबैभन्दा शक्तिशाली, निर्णयकारी निकाय बनाइने प्रतिबद्धता जाहेर गर्दै पञ्चायती व्यवस्थालाई राज्य निर्माणको आधार स्तम्भका रूपमा विकसित गर्ने स्पष्ट सन्देश दिए।
एसकेएम सरकारले पञ्चायती प्रणालीलाई औपचारिकता मात्र ठानेको बताउँदै वर्तमान पञ्चायतहरूलाई सत्ता पार्टीका ब्लक तथा वार्ड तहका कार्यकर्ताहरूबाट हेपिनु परेको र तिनीहरूलाई केवल समारोहमा भीड बढाउने साधनका रूपमा प्रयोग गरिएको आरोप लगाए। उनले आफू मल्ली डाँडामा पञ्चायत अध्यक्ष छॅंदा उक्त पञ्चायतलाई देशकै नमूना ग्राम पञ्चायत बनाएको उदाहरण दिएर वर्तमान व्यवस्थालाई चुनौती दिए। विकसित मुलुकहरू विकेन्द्रीकरणमार्फत अघि बढेको सन्दर्भ कोट्याउँदै, सिक्किमका कतिपय पञ्चायती संरचनाले जनतालाई नै पीडा दिइरहेको अवस्थाबारे पनि उनले बताए।
कार्यक्रममा एसडीएफ पार्टीका पूर्व संयोजक कमल चापागाईं (कमल गुरुजी), पूर्व एसआरपी उम्मेदवार विनोम लेप्चा, पूर्व पञ्चायत तथा सत्तारूढ एसकेएम र एसडीएफसहित 50 भन्दा धेरै सिटिजन एक्सन पार्टीमा सामेल भएको प्रेस विज्ञप्तिमा दाबी गरिएको छ।