२० माइल सडक अवरोध र ‘जन उन्मुक्ति दिवस’ लाई लिएर एसडीएफको सरकारमाथि आरोप

गान्तोक, 09 अगस्त। सिक्किम डेमोक्रेटिक फ्रन्ट (एसडीएफ) ले २० माइल क्षेत्रमा लामो समयदेखि अवरुद्ध रहेको राष्ट्रिय राजमार्ग १०ए सञ्चालनमा ल्याउन सरकारले ढिलाइ गरेको आरोप लगाउँदै वर्तमान सरकारको आलोचना गरेको छ।एसडीएफका वरिष्ठ उपाध्यक्ष (प्रचार-प्रसार) अम्बर राईले आइतबार जारी गरेको प्रेस विज्ञप्तिमा सडक अवरोधका कारण यात्रु, बिरामी, विद्यार्थी तथा महिलाहरूले लामो समयदेखि समस्या र अतिरिक्त आर्थिक भार व्यहोर्नुपरेको दाबी गरेका छन्।राईले केही दिनयता सरकारी संयन्त्र परिचालन गरी सडक सुचारु गर्ने प्रयास भइरहेको उल्लेख गर्दै ‘यही काम पहिले नै किन गरिएन?’ भन्ने प्रश्न गरेका छन्। उनले सरकार आफ्नो कार्यक्रम नजिकिएपछि मात्र २० माइलको सडक खोल्न सक्रिय भएको आरोप लगाएका छन्।एसडीएफले १० अगस्तमा आयोजना हुने ‘जन उन्मुक्ति दिवस’ लाई लिएर पनि सरकारको आलोचना गरेको छ। राईले उक्त दिवसलाई विशेष महत्व दिने प्रयासको आधार नै गलत रहेको दाबी गर्दै एउटा राजनीतिक घटनालाई ठूलो ऐतिहासिक घटनाका रूपमा प्रस्तुत गर्न खोजिएको आरोप लगाए।एसडीएफले ‘जन उन्मुक्ति दिवस’ कार्यक्रममा आमाहरूको सहभागितालाई लिएर पनि प्रश्न उठाएको छ। राईले सरकारी नगद योजनाबिना कार्यक्रममा सहभागिता नहुने भएकाले मात्र आमाहरूलाई कार्यक्रममा सहभागी गराउन खोजिएको दाबी गरे।उनले १५ अगस्त, २६ जनवरी र २ अक्टोबरजस्ता ऐतिहासिक दिनहरूमा जनताले कुनै आर्थिक प्रलोभनबिना स्वेच्छाले सहभागिता जनाउने उल्लेख गर्दै ‘जन उन्मुक्ति दिवस’ को औचित्यमाथि प्रश्न उठाएका छन्।एसडीएफले सरकारले २० माइल सडकको समस्या समाधानमा स्थायी र समयमै पहल गर्नुपर्ने तथा राज्यका स्रोतसाधनलाई कुनै दल विशेषको हितमा प्रयोग गर्न नहुने माग गरेको छ।