गान्तोक, 12 फरवरी । सिक्किममा आगामी 19 देखि 22 मार्च, 2026 सम्म ‘प्रथम सिक्किम अन्तरराष्ट्रिय फिल्म फेस्टिभल’ आयोजना हुने भएको छ। यस फिल्म महोत्सवको उद्देश्य सिनेमा कलाको उत्सव मनाउनु तथा सिक्किमलाई फिल्म निर्माण र सांस्कृतिक आदान-प्रदानको लागि उदीयमान गन्तव्यको रूपमा प्रवर्द्धन गर्नु रहेको छ।
आईपीआर विभागले राजधानीमा आज आयोजना गरेको एक पत्रकार सम्मेलनमा सिक्किम सङ्गीत, नाटक, नृत्य र चलचित्र बोर्डका अध्यक्ष टाशी छिरिङ भोटियाले सिक्किम अन्तरराष्ट्रिय फिल्म महोत्सवको आयोजना फिल्म संस्कृतिलाई सुदृढ़ बनाउने र रचनात्मक प्रतिभालाई अर्थपूर्ण मञ्च प्रदान गर्ने राज्यको एक महत्त्वपूर्ण उपलब्धि रहेको बताए। उनले मुख्यमन्त्री प्रेमसिंह तामाङको मार्गदर्शन र संरक्षणमा २०१९ देखि सिक्किम रचनात्मक अर्थतन्त्रको लागि एक विशिष्ट केन्द्रको रूपमा विकसित भएको बताए।
आईपीआर विभागका अध्यक्ष अशित राईले यस फिल्म महोत्सवले अर्थपूर्ण आदान-प्रदान र सहकार्यको लागि मञ्च प्रदान गर्ने र सिक्किमलाई विश्वका फिल्म निर्माताहरूका लागि अनुकूल गन्तव्यको रूपमा स्थापित गर्ने विश्वास व्यक्त गरे।
आईपीआर विभागकी सचिव अन्नपूर्ण आलले महोत्सव राजधानीका तीन स्थान मनन केन्द्र, वेस्ट पोइन्ट मल र चिन्तन भवनमा आयोजना हुने बताइन्। उनले यस चार दिवसीय फिल्म महोत्सव राष्ट्रिय तथा अन्तरराष्ट्रिय चलचित्रहरूको विशेष प्रदर्शनका साथै छलफल, मास्टरक्लास र चलचित्र जगतका प्रख्यात व्यक्तित्वहरूसँग अन्तरक्रियात्मक सत्रहरू समावेश हुने जानकारी गराइन्।
यसरी नै मुख्यमन्त्रीका प्रेस सचिव युगेन तामाङले महोत्सव अन्तर्गत चलचित्र निर्माताहरू र सिनेमा व्यवसायीहरूसँग अन्तरक्रिया, छलफल र संलग्नता सहितको विशेष कार्यक्रम हुने बताए, जसले चलचित्र निर्माताहरू, कला र कला क्षेत्रबीच संवाद, ज्ञान आदान-प्रदान र सहकार्यको लागि एक जीवन्त मञ्च प्रदान गर्नेछ। उनले यस महोत्सवले फिल्म तथा अन्य रचनात्मक क्षेत्रमा करियर बनाउन चाहनेहरूका लागि प्रेरणा प्राप्त गर्ने बहुमूल्य अवसर प्रदान गर्ने बताए।
