जिल्लापालले गरे रिम्बी राहत शिविरको निरीक्षण, पैह्रो पीडित परिवारलाई चेक वितरण

गेजिङ, 28 सेप्टेम्बर । गेजिङका जिल्लापाल तेन्जिङ डी. डेनजोङ्पाले सोमबार रिम्बीस्थित राहत शिविरको भ्रमण गरी २५ सेप्टेम्बर, २०२६ मा गएको ठूलो पैह्रोबाट प्रभावित परिवारसँग भेटघाट गरेका छन्। भ्रमणका क्रममा जिल्लापालले क्षतिग्रस्त घरको पुनर्स्थापना तथा मर्मतका लागि प्रभावित परिवारहरूलाई राहत रकमका चेक हस्तान्तरण गरे। प्रभावित परिवारको मूल्याङ्कनका आधारमा १४ भाडामा बस्ने परिवारलाई घर पुनर्स्थापनाका लागि प्रतिपरिवार ५० हजार रुपियाँका दरले अनुग्रह सहायता प्रदान गरिएको छ। यसैगरी, पूर्ण रूपमा क्षतिग्रस्त घरको मर्मतसम्भारका लागि ३३ प्रभावित परिवारलाई प्रतिपरिवार १ लाख ३० हजार रुपियाँका दरले सहायता प्रदान गरिएको छ।जिल्ला प्रशासनले सम्बन्धित विभागसँगको समन्वयमा पैह्रो गएको समयदेखि नै रिम्बीको अवस्थाको निरन्तर निगरानी गर्दै प्रभावित परिवारलाई आवश्यक सहयोग उपलब्ध गराउँदै आएको छ। जिल्लापालले कठिन परिस्थितिमा प्रशासनले अवस्थाको नजिकबाट निगरानी जारी राख्नुका साथै आवश्यक सहयोग उपलब्ध गराइरहने आश्वासन प्रभावित परिवारलाई दिए।यसै क्रममा उनले सडक तथा पुल विभागले प्रभावित सडकको मर्मत गरी पुनः सञ्चालनमा ल्याएको प्रयासको प्रशंसा गरे। सडक सञ्चालनमा आएपछि क्षेत्रमा आवागमन तथा सम्पर्क सुविधा सुधार भएको उनले बताए।जिल्लापालले प्रभावित परिवारलाई राहतसम्बन्धी कार्यमा प्रभावकारी समन्वय, व्यवस्थापन र सहजीकरण सुनिश्चित गर्न राहत शिविर समिति गठन गरिएको जानकारी पनि दिए। सम्बन्धित सरोकारवाला तथा प्रभावित परिवारबीच सूचना, अद्यावधिक विवरण र आवश्यक निर्देशन समयमै आदानप्रदान गर्न छुट्टै ह्वाट्सएप समूहसमेत गठन गरिएको छ।जिल्ला प्रशासनले रिम्बीमा राहत, पुनर्स्थापना तथा अवस्थाको निरन्तर निगरानीका लागि समन्वयात्मक रूपमा काम गर्ने प्रतिबद्धता दोहोर्याएको छ।