मुख्यमन्त्रीले संसदीय समितिको प्रतिनिधिमण्डलसॅंग भेट गरे

गान्तोक, 23 अप्रेल। मुख्यमन्त्री प्रेमसिंह तामाङले राज्यसभाको अधीनस्थ विधान सम्बन्धी संसदीय समितिको प्रतिनिधिमण्डलसॅंग आज बिहान आफ्नो सरकारी निवासी मिन्तोकगाङमा भेट गरे। सांसद सदस्य एवं समितिका अध्यक्ष मिलिन्द मुरली देवडाले अगुवाई गरेको प्रतिनिधिमण्डलमा राज्यसभा सचिवालयका निर्देशक हर प्रतीक आर्य र अधिकारीहरू सामेल थिए।
यस भेटघाटको क्रममा सिक्किममा विशेष ध्यान केन्द्रित गर्दै उत्तरपूर्वी क्षेत्रको विकासात्मक प्रगतिको बारेमा अर्थपूर्ण चर्चा भएको मुख्यमन्त्रीले आज सामाजिक सञ्जालमा जानकारी गराएका छन्। उनले प्रतिनिधिमण्डलसॅंग पूर्वाधार बढाउन, कनेक्टिभिटी बढाउन र आर्थिक वृद्धिका लागि नयाँ अवसरहरू सिर्जना गर्न विभिन्न अवसरहरूमाथि छलफल गरेको बताएका छन्।
मुख्यमन्त्रीले दिगो पर्यटन, जैविक खेती र स्वच्छ ऊर्जाको क्षेत्रमा सिक्किममा लगानी सम्भावनाहरूको बारेमा प्रतिनिधिमण्डलको ध्यान आकर्षित गराए। उनले समितिको भ्रमण र यस क्षेत्रमा उनीहरूको रुचिको निम्ति सम्मान व्यक्त गरेका छन्। मुख्यमन्त्रीले यस्ता संलग्नताहरू उत्तरपूर्वी राज्यहरूको आवश्यकता र आकांक्षाहरूलाई राष्ट्रिय स्तरमा प्रतिनिधित्व र सम्बोधन गर्न महत्त्वपूर्ण रहेको बताएका छन्।
यस अवसरमा सिक्किमका लोकसभा सांसद डा. इन्द्रहाङ सुब्बा पनि उपस्थित थिए।