सिक्किम र पश्चिम बंगालका मुख्यमन्त्रीको भेट, सुस्वास्थ भवन निर्माण र काउन्टरसाइन परमिट वृद्धिलाई हरियो झण्डा

गान्तोक, 02 जुलाई। मुख्यमन्त्री प्रेमसिंह तामाङले आज कोलकातास्थित राज्य सचिवालय नवान्नमा पश्चिम बंगालका मुख्यमन्त्री शुभेन्दु अधिकारीसँग शिष्टाचार भेट गरे। भेटको क्रममा उनले पश्चिम बंगालको मुख्यमन्त्रीको पदभार ग्रहण गरेकोमा हार्दिक बधाई दिँदै सफल र फलदायी कार्यकालका लागि शुभकामना व्यक्त गरे। उक्त जानकारी मुख्यमन्त्रीले आज सामाजिक सञ्जाल फेसबुक पोस्टमा दिएका छन्।भेटका क्रममा दुई नेताबीच विभिन्न महत्त्वपूर्ण विषयमा विस्तृत छलफल भयो। विशेष रूपमा, सिलगढ़ीस्थित एसएनटी कम्प्लेक्समा उपचारका लागि आउने सिक्किमका नागरिकहरूलाई सहयोग पुर्याउने उद्देश्यले निर्माण गरिने ‘सुस्वास्थ भवन सिक्किम’ सम्बन्धी लामो समयदेखि रोकिएको प्रस्तावबारे छलफल भएको उनले जानकारी गराएका छन्। पश्चिम बंगालका मुख्यमन्त्रीले यस योजनाको महत्त्वलाई स्वीकार गर्दै प्रस्तावलाई स्वीकृति प्रदान गरेको र सम्बन्धित विभागलाई आवश्यक अनुमति जारी गर्न निर्देशन दिएको पनि उनले अवगत गराए का छन्। मुख्यमन्त्रीले उनको शीघ्र तथा सकारात्मक निर्णयप्रति हार्दिक आभार व्यक्त गरेका छन्।यस अतिरिक्त, सिक्किम र पश्चिम बंगाल सरकारबीचको पारस्परिक यातायात सम्झौताबारे पनि छलफल भएको उनले बताए। विशेषगरी, पश्चिम बंगालमा सञ्चालन हुने सिक्किममा दर्ता भएका ट्याक्सीका लागि काउन्टरसिग्नेचर अनुमति (काउन्टरसाइन परमिट) को कोटा वृद्धि गर्ने लामो समयदेखिको मागबारे गम्भीर छलफल भयो। यस सम्बन्धमा पश्चिम बंगालका मुख्यमन्त्रीले विद्यमान ३,००० कोटालाई बढाएर ६,००० पुर्याउने महत्त्वपूर्ण निर्णय गरेको जानकारी गराएका छन्। मुख्यमन्त्रीले यसबाट सिक्किममा दर्ता भएका थप धेरै ट्याक्सीहरूले पश्चिम बंगाल, विशेषगरी सिलगढी लगायतका क्षेत्रमा सञ्चालन गर्न पाउनेछन्, जसबाट सिक्किमकि सारथीहरू प्रत्यक्ष रूपमा लाभान्वित हुनेछन् र अन्तरराज्यीय यातायात तथा सम्पर्क थप सुदृढ़ हुने बताएका छन्।भेटमा २०२३ मा भएको हिमताल फुटेर आएको बाढी (ग्लोफ) पछि टिस्टा नदीको सतह उक्लिँदा राष्ट्रिय राजमार्ग-१० मा भएको व्यापक क्षति र सिक्किमसँगको आवागमनमा परेको असरबारे पनि छलफल भयो। यस समस्याको दीर्घकालीन समाधानका लागि सिक्किम र पश्चिम बंगाल सरकारको संयुक्त पहलमा टिस्टा नदीमा वैज्ञानिक विधिबाट ड्रेजिङ (नदीको सतह सफा गर्ने कार्य) गरी तलछट व्यवस्थापन गर्ने विषयमा सहमति भएको उनले जानकारी गराएका छन्।मुख्यमन्त्रीले यी महत्त्वपूर्ण विषयमा फलदायी छलफल तथा शीघ्र र सकारात्मक निर्णयको लागि पश्चिम बंगालका मुख्यमन्त्रीप्रति आभार व्यक्त गरेका छन्।