भारतको मानचित्रबाट सिक्किमलाई हटाएकोमा भाजपाद्वारा कडा आपत्ति

गान्तोक, 14 मई। भारतको एक प्रतिष्ठित समाचार पत्र ‘द हिन्दू’ ले 13 मईका दिन प्रकाशित आफ्नो संस्करणमा भारतको मानचित्रबाट सिक्किम राज्यलाई कथित हटाएको छ, जसलाई लिएर भारतीय जनता पार्टी (भाजपा) सिक्किमले कडा आपत्ति जनाउॅंदै निन्दा गरेको छ। भाजपा सिक्किमले यसलाई गैर जिम्मेवार र असंवेदनशील कार्य एवं भारतीय गणराज्यको सम्प्रभुता र क्षेत्रीय अखण्डताको घोर अपमान ठहर गरेको छ।
प्रदेश भाजपा मिडिया प्रभारी निरेन भण्डारीले भारतको एक अविभाज्य र गौरवशाली भाग सिक्किमले आगामी 16 मईका दिन राज्य स्थापनाको 50औं वर्षगॉंठ मनाउन लागिरहेको र संविधानको धारा 371एफ अन्तर्गत राज्यको विशिष्ट पहिचान सुरक्षित रहेको विज्ञप्तिमा उल्लेख गरेका छन्। उनले लापरवाही अथवा जानीजानी राष्ट्रिय नक्साबाट सिक्किमलाई हटाउनु सिक्किमका जनताको अपमान र राष्ट्रको एकता र अखण्डतामाथि आक्रमण हो भनी बताएका छन्।
उनले भाजपा सिक्किम राज्य एकाइले ‘द हिन्दू’ को सम्पादकीय बोर्डबाट तत्काल र बिना शर्त सार्वजनिक माफी माग्न र प्रकाशित सामग्रीको स्पष्ट सुधारको माग गरेका छन्। यसैगरी, उनले केन्द्रिय सूचना तथा प्रसारण मन्त्रालयलाई पनि यस विषयलाई संज्ञानमा लिएर उचित कारबाही गर्न आग्रह गरेका छन्।
मिडिया प्रभारी भण्डारीले एक प्रतिष्ठित राष्ट्रिय दैनिक पत्रिकाद्वारा यस्तो लापरवाह प्रस्तुतिले सिक्किमका जनताको भावना र अधिकारप्रतिको खतरनाक उपेक्षालाई प्रतिबिम्बित गर्दछ भनेका छन्। उनले द हिन्दू र सबै मिडिया संस्थाहरूलाई राष्ट्रिय एकता, संवैधानिक अखण्डता र पत्रकारिताको जवाफदेहिता कायम राख्न सुझाउ पनि दिएका छन्। उनले भाजपा सिक्किम राज्यको सम्मानको रक्षामा दृढतापूर्वक उभिएको छ भन्दै भारतीय संघभित्र आफ्नो उचित स्थानलाई कमजोर पार्ने कुनै पनि प्रयासको प्रतिरोध गरिरहनेछ भनी प्रतिबद्धता व्यक्त गरेका छन्।