लागूऔषध दुरुपयोग रोकथामका लागि सरकार, समुदाय र व्यक्तिहरूको सहकार्यात्मक प्रयास महत्वपूर्ण: मुख्यमन्त्री

गान्तोक, 26 जून। सिक्किम सरकारको सामाजिक कल्याण विभागले आज राजधानीको मनन केन्द्रमा लागूऔषध दुरुपयोग तथा अवैध तस्करी विरुद्ध अन्तरराष्ट्रिय दिवस पालन गरियो। ‘ब्रेकिङ द चेन्स: प्रिभेन्शन, ट्रीटमेन्ट एण्ड रिकभरी फर् अल’ थीममाथि आयोजित उक्त कार्यक्रममा मुख्यमन्त्री प्रेमसिंह तामाङ मुख्य अतिथि थिए।
कार्यक्रमको शुरुवात मुख्यमन्त्रीद्वारा 13 वटा मिनी डम्पर रिसोर्स रिकभरी वाहनहरूको लोकार्पणद्वारा भएको थियो। उक्त वाहनहरू सामाजिक कल्याण विभागद्वारा ग्रामीण विकास विभागलाई हस्तान्तरण गरिएको छ। प्रधानमन्त्री जन विकास कार्यक्रम अन्तर्गत वित्त पोषित उक्त वाहनहरूको उपयोग दिगो विकास र समावेशी वृद्धिलाई अगाडि बढाउनको लागि गरिने बताइएको छ।
कार्यक्रमलाई सम्बोधन गर्दै मुख्यमन्त्री तामाङले लागूऔषधको दुरुपयोगमाथि गहिरो चिन्ता प्रकट गर्दै यो राज्य र राष्ट्रको मात्र नभएर एउटा वैश्विक समस्या रहेको बताए। उनले यो जटिल समस्यालाई सम्बोधन गर्न सरकार, समुदाय र व्यक्तिहरूको सहकार्यात्मक प्रयासको महत्वमा जोड दिए।
उनले नागरिकहरूलाई व्यक्तिगत जिम्मेवारीको भावना प्रवर्द्धन गर्न आफूलाई संलग्न हुन प्रोत्साहित गरे। मुख्यमन्त्रीले नशामुक्त सिक्किम निर्माणमा महत्वपूर्ण भूमिका निर्वाह गरिरहेकोमा सिक्किम पुलिसको प्रयासको सराहना गरे।
उनले लागूऔषध दुरुप्रयोग रोकथामको लागि सरकारले जागरूकता अभियान, प्रत्येक विभागमा नाडल अधिकारीहरूको नियुक्त, कार्यालयहरूमा ड्रग फ्री सेलको गठन, खेलकुद, कला र सांस्कृतिक गतिविधिहरूको प्रवर्द्धन आदि जस्ता पहलहरू निरन्तर गरिरहेको अवगत गराए। उनले विद्यालयहरूमा एण्टी ड्रग सेलहरूलाई सशक्त बनाउने तथा बेचबिखन नियन्त्रण गर्न सिक्किम पुलिस र आबकारी विभागद्वारा कडा कार्यान्वयन सुनिश्चित गरिएको पनि बताए।
यस अघि मन्त्री लेप्चाले युवाहरू लागूपदार्थको प्रभावको जोखिममा बढ्दो रूपमा रहेको बताउॅंदै रोकथाम प्रयासहरूमा युवाहरूलाई संलग्न गराउन, सहयोग प्रदान गर्न र स्वस्थ विकल्पहरूलाई प्रवर्द्धन गर्न आवश्यकता रहेको बताए। उनले यस विषयलाई प्राथमिकता दिएकोमा मुख्यमन्त्रीको दूरदर्शी नेतृत्वको प्रशंसा गरे।
सल्लाहकार लेप्चाले नशामुक्त सिक्किम निर्माणको निम्ति नशामुक्त भारत अभियान अन्तर्गत सामूहिक प्रयासमा जोड दिइन्। उनले यसको निम्ति निवारण, जागरूकता, प्रवर्तन, र पुनर्वासका चार मुख्य स्तम्भहरूमाथि प्रकाश पारिन्।
कार्यक्रममा सिक्किम विधानसभा अध्यक्ष एमएन शेर्पा र उपाध्यक्ष राजकुमारी थापा, विभिन्न विभागका वरिष्ठ अधिकारीहरू पनि उपस्थित थिए।