मल्ली डॉंड़ा जीपीयूमा ‘अन्तरराष्ट्रिय ज्येष्ठ नागरिक दिवस’ पालन गरियो

मल्ली, 1 दिसम्बर । महिला, बालबालिका, वरिष्ठ नागरिक एवं दिव्याङ्गजन कल्याण विभाग, नाम्ची जिल्लाले आज मल्ली डॉंड़ा जीपीयूमा ‘अन्तरराष्ट्रिय ज्येष्ठ नागरिक दिवस’ पालन गऱ्यो। ‘स्थानीय र विश्वव्यापी कार्यवाहीको नेतृत्व गर्दै ज्येष्ठ नागरिकहरू: हाम्रा आकांक्षाहरू, हाम्रो कल्याण, हाम्रा अधिकारहरू’ थीममा आयोजित कार्यक्रममा क्षेत्र विधायक एनबी प्रधान मुख्य अतिथि थिए।
विधायक प्रधानले आफ्नो सम्बोधनमा आमाबाबुले आफ्ना नानीहरूमा राम्रो संस्कार बसाल्नु पर्छ, किनकि यो एक जिम्मेवार र सम्मानजनक व्यक्तिको पालनपोषणको आधार हो भनी बताए। उनले ज्येष्ठ नागरिकहरूलाई आफ्नो समुदायको कल्याणमा योगदान दिइरहन आग्रह पनि गरे। विधायकले उनीहरू सेवानिवृत्ता भए तापनि उनीहरूसँग अर्थपूर्ण योगदान गर्ने ऊर्जा र अनुभव रहेको उल्लेख गरे। उनले समाजको सेवा गरिरहेका ज्येष्ठ व्यक्तिहरूको उदाहरण उद्धृत गर्दै अरूलाई पनि आफ्नो नेतृत्व प्रदान गर्न प्रोत्साहित गरे।
विधायक प्रधानले पञ्चायत सदस्यहरूको ध्यान आकर्षित गर्दै उनीहरूलाई आफ्नो कार्यालयमा उपलब्ध रहन अपील गरे ताकि मानिसहरूले सजिलै सेवाहरूसम्म पहुँच गर्न सकून् र आफ्ना समस्याहरू समाधान गर्न सकून्। उनले गलत सञ्चारका कारण धेरै कल्याणकारी योजनाहरू बेवास्ता हुन्छन् र ज्येष्ठ नागरिकहरू प्रायः उनीहरूका लागि लक्षित लाभहरूबाट वञ्चित हुन्छन् भनी बताए। उनले सबै ज्येष्ठ नागरिकहरूलाई अधिकतम लाभ प्राप्त गर्न ज्येष्ठ नागरिक कार्ड बनाउन प्रोत्साहित गरे।
नामचीकी जिल्लापाल अनुपा तामलिङले आफ्नो सम्बोधनमा समाजका ज्येष्ठ सदस्यहरूको संरक्षण र सहयोगको महत्त्वमा जोड दिइन्। उनले ज्येष्ठ नागरिकहरूलाई उनीहरूको कल्याण र संरक्षणका लागि बनाइएका विभिन्न योजना र ऐनहरूबारे सचेत हुनु आवश्यक रहेको उल्लेख गरिन्। उनले कुनै समस्या उत्पन्न भएमा जिल्लापाल वा एसडीएम कार्यालयमा लिखित निवेदन गर्न सकिने बताउॅंदै अधिकारीहरूले आवश्यक कारबाही गर्ने बताइन्। उनले ज्येष्ठ नागरिकहरूको कल्याणको लागि काम गर्न प्रशासन प्रतिबद्ध रहेको आश्वासन दिइन्।
कार्यक्रममा तीन जना वरिष्ठ नागरिकहरूलाई सम्मानित गरियो। यसैगरी, समाजमा योगदानको लागि सेवानिवृत्त कर्मचारीहरू र वरिष्ठ सदस्यहरूलाई सम्मानित गरियो। यसैगरी, कार्यक्रममा उपस्थित वरिष्ठ नागरिकहरूलाई ब्ल्याङ्केट, हिँड्ने लौरो, ह्वीलचेयर, श्रवण यन्त्र, घुँडाका ब्रेसेस र हिप ब्रेसेस वितरण गरियो।