गान्तोक, ८ दिसम्बर : सिक्किमको साहित्यिक सम्पदाको महत्वपूर्ण उत्सवस्वरूप मुख्यमन्त्री प्रेम सिंह तामाङले आज “माटो पिरती” काव्य–सङ्ग्रहको औपचारिक विमोचन गरे। यो कृति यस वर्षको अक्टोबर १८ मा सम्पन्न “माटो कवि जीवन थिङ कविता उत्सव–२०२५” मा सिक्किमेली कविहरूद्वारा वाचन गरिएका कविताहरूको सङ्कलन हो। सिक्किम अकादेमी पुरस्कार–२०२५ को अवसरमा सम्मान भवन, गान्तोकमा आयोजित कार्यक्रममा राज्यभरिका साहित्यकार, सांस्कृतिककर्मी तथा कविताप्रेमीहरूको उपस्थिति रहेको थियो।
सिक्किम अकादेमीद्वारा प्रकाशित यस काव्य–सङ्ग्रहमा नेपाली, हिन्दी र अङ्ग्रेजी भाषामा सिर्जित कविता समावेश छन्, जसले सिक्किमको बहुभाषिक सृजनात्मकतालाई उजागर गर्छ। कुल ४० जना कविका रचनाहरू समावेश पुस्तकको सम्पादन चर्चित कवि प्रवीण खालिङले गरेका हुन्। उनले कृति प्रकाशनमा सहकार्य र समर्थन प्रदान गर्ने सबै कवि तथा अकादेमीप्रति आभार व्यक्त गरे।
सिक्किम अकादमीका अध्यक्ष एस. आर. सुब्बाले “माटो कवि जीवन थिङ कविता उत्सव” लाई आगामी वर्षहरूमा पनि अकादेमीको वार्षिक सांस्कृतिक पात्रोमा नियमित रूपमा समावेश गरिने जानकारी दिए। उनका अनुसार यसले उदाउँदै गरेका लेखकहरूलाई सृजनात्मक मञ्च प्रदान गर्नुका साथै सिक्किमको जीवन्त काव्य–परम्पराको संरक्षणमा महत्वपूर्ण भूमिका खेल्नेछ।
मुख्यमन्त्री प्रेम सिंह तामाङले सिक्किम अकादेमीको प्रयासको प्रशंसा गर्दै कलात्मक अभिव्यक्तिको प्रवर्द्धन राज्यको प्राथमिकता भएको बताए। उनले योगदान दिने सबै कविहरूलाई सिक्किमको माटो, मन र पहिचानलाई कविता मार्फत् उजागर गरेकोमा बधाई ज्ञापन गरे।
“माटो पिरती” काव्य–सङ्ग्रहको प्रकाशनले समकालीन सिक्किमी साहित्यमा एउटा महत्वपूर्ण अध्याय थपेको छ र राज्यको भाषिक तथा सांस्कृतिक विविधताको संरक्षण र प्रवर्द्धनप्रतिको प्रतिबद्धतालाई अझ सुदृढ बनाएको छ।
