राज्यका विभिन्न ठाउॅंहरूमा पक्षीहरूको असामान्य मृत्युदर बढ्दो, विभागद्वारा मूल्याङ्कन र निवारण पहल शुरू

गान्तोक, 28 जनवरी । राज्यका विभिन्न क्षेत्रहरूमा परेवा र कागको असामान्य मृत्यु भइरहेका घटनाहरू प्रकाशमा आइरहेका छन्। पक्षीहरूका असामान्य मृत्युका कारणहरूको पत्तो लगाउन राज्य पशुपालन एवं पशु चिकित्सा सेवा विभागले स्थितिको मूल्याङ्कन कारबाही शुरू गरेको छ।
राज्य पशुपालन एवं पशु चिकित्सा सेवा विभागले आज जारी एक प्रेस विज्ञप्तिमा भनेको छ, हालै राज्यका विभिन्न क्षेत्रहरूबाट परेवा र कागको असामान्य मृत्युका घटनाहरू रिपोर्ट गरिएका छन्, जसमा केही चराहरूमा टर्टीकोलिस, गोलो गोलो घुम्ने, लम्पसार पर्ने, सुस्त हुने र डिप्रेसन जस्ता लक्षणहरू देखा परेका छन्। यी रिपोर्टहरूपछि विभागले स्थितिको मूल्याङ्कन र नियन्त्रण गर्न तत्काल कारबाही शुरु गरेको बताइएको छ।
विभागले भनेको छ, नाम्ची, रानीपूल, बरदाङ र तादोङका प्रभावित क्षेत्रहरूमा पशु चिकित्सक, प्यारा-पशु चिकित्सक र प्रयोगशाला कर्मचारीहरू सम्मिलित द्रुत प्रतिक्रिया टोलीलाई तुरुन्तै घटना भएका स्थानहरूमा खटाइयो। टोलीले प्रभावित क्षेत्रहरूको जॉंच गर्दै प्रभावित चराहरूका नमूनाहरू सङ्कलन गरी थप संक्रमण रोक्न वरपरका क्षेत्रहरूको पूर्ण कीटाणुशोधन गरिएको जनाइएको छ। प्रभावित क्षेत्रहरूमा लक्षण देखा परेका चराहरूलाई तत्काल एन्टिबायोटिकसहित सहायक उपचार प्रदान गरिएको पनि बताइएको छ।विभागले प्रभावित परेवाको सङ्कलन गरिएका नमूनाहरू विस्तृत परीक्षणको लागि राज्य पशु रोग निदान प्रयोगशालामा प्रशोधन गरिएको जनाएको छ। प्रयोगशाला अनुसन्धानले हेमोप्रोटियस कोलम्बे र एमेरिया प्रजातिहरूको उपस्थिति पत्ता लागेको छ। परेवाहरूमा हेमोप्रोटियस कोलम्बेको प्रचलन परजीवी प्रकोप, पोषणको कमी र पर्यावरणीय तनाव जस्ता कारकहरूबाट प्रभावित हुन सक्ने आशंका व्यक्त गरिएको छ। यी परजीवी संक्रमणहरू सामान्यतया परेवामा देखा पर्ने र जुनोटिक प्रसारणसँग सम्बन्धित नरहेको पनि स्पष्ट गरेको छ।
नमूनाहरू रानीखेत रोगको लागि पनि परीक्षण गरिएको र परिणाम नेगेटिभ आएको जनाइएको छ। यसैगरी, ब्याक्टेरियोलोजिकल परीक्षणहरू पनि सञ्चालन गरिएको र परिणाम नेगेटिभ आएकाले पक्षीहरूको मृत्यु ब्याक्टेरियाले भएको हुन सक्ने आशंका समाप्त भएको बताइएको छ।
थप पुष्टिको लागि र सावधानीपूर्वक निगरानी उपायको रूपमा विभागले कोलकाता र भोपाल पनि पठाएको जानकारी गराएको छ। विभागले परिस्थितिलाई नजिकबाट निगरानी गरिरहेको र मानिसहरूलाई मृत वा बिरामी चराहरू नछुन र यस्ता घटनाको जानकारी नजिकको पशु चिकित्सा कार्यालयमा गर्न आग्रह गरेको छ।