गान्तोक, 08 फरवरी । मुख्यमन्त्री प्रेमसिंह तामाङले आज अप्पर बर्तुक निर्वाचन क्षेत्रअन्तर्गत रेशिथाङ छेउ क्षेत्र विधायक कला राईको उपस्थितिमा ‘हाम्रो गाउॅंले बजार’ को उद्घाटन गरे। यस जैविक बजारले किसानहरूलाई आफ्नै खेतमा उत्पादन गरिएको उत्पाद सिधै उपभोक्तासम्म बिक्री गर्न सक्षम बनाउने बताइएको छ।
मुख्यमन्त्रीले आफ्नो सम्बोधनमा सरकारी खर्चबिनै बजार स्थापना गर्न योगदान दिने सबैप्रति आभार व्यक्त गरे। उनले किसानहरूले खेतबाट आफ्नो कृषि उत्पादन सिधै बजारमा बेच्न सकून् भन्ने उद्देश्यले बजारको अवधारणा अघि सारिएको बताए। यसलाई ग्रामीण आर्थिक गतिविधिको केन्द्रका रूपमा विकास गर्ने दृष्टिकोण रहेको उल्लेख गर्दै उनले पसलेहरूसँग कृषि भूमि भएको सुनिश्चित गर्न प्रमाणीकरणको आवश्यकमा जोड दिॅंदै यसले बजारको मौलिक अवधारणालाई सुरक्षित राख्ने बताए।
मुख्यमन्त्रीले राजधानीको भीडभाड कम गर्न शहरी विकास तथा आवास विभागमार्फत रांकामा नयाँ टाउनशिप विकास गरिने घोषणा गरे। यसैगरी, उनले बर्तुक डिग्री ल कलेजलाई माङखिममा स्थानान्तरण गरिने र त्यसपछि शिक्षा विभागलाई हालको कलेज भवन परिसरमा सारिने जानकारी दिए। उनले अप्पर बर्तुकमा नयॉं प्याराग्लाइडिङ ल्यान्डिङ स्पट विकास गरिने घोषणा पनि गरे र अघिल्लो स्थल ‘खेलो इन्डिया’ का लागि छुट्याइएको जानकारी गराए।
मुख्यमन्त्रीले अप्पर बर्तुकका लागि आठवटा सडकसहित २४.६७ किलोमिटर सडक स्वीकृत गरिएको जानकारी गराए। यसरी नै सडक तथा पुल विभागअन्तर्गत ४५० किलोमिटर सडक कालोपत्रे गर्ने टेन्डर स्वीकृत भएको पनि उनले घोषणा गरे। उनले पहिलो चरणमा राष्ट्रिय, राज्य तथा जिल्ला राजमार्गहरू समेटिने र दोस्रो चरणमा फिडर सडकहरू समावेश गरिने अवगत गराए।
मुख्यमन्त्रीले बजार हप्तामा दुई पटक सञ्चालन गर्न सुझाउ दिए र बिचौलियाहरूलाई अनुमति नदिइन जोड दिए। उनले ट्रक स्ट्यान्ड निर्माणको घोषणा गर्दै विभिन्न विभागीय एक्स्पोहरू यही परिसरमा आयोजना गर्न पनि सुझाउ दिए। यस अतिरिक्त, उनले पर्यटन विभागलाई राजधानीका पर्यटकीय गन्तव्यहरूमा यस बजारलाई पनि समावेश गर्न निर्देशन दिए।
आफ्नो सम्बोधनमा क्षेत्र विधायक कला राईले मुख्यमन्त्रीको नेतृत्वप्रति कृतज्ञता व्यक्त गर्दै “सुनौलो, समृद्ध अनि समर्थ सिक्किम” को दृष्टिकोण दोहोर्याइन्। उनले समृद्धि हासिल गर्न ग्रामीण अर्थतन्त्र सुदृढ पार्न उपयुक्त मञ्चहरू आवश्यक रहेको बताउँदै कृषकहरूले भोगिरहेका चुनौतीहरूमाथि पनि प्रकाश गरिन्। समान सहभागिता सुनिश्चित गर्न स्थायी स्टल स्वामित्व नहुने जानकारी दिँदै बजारलाई खानपान, सांस्कृतिक प्रस्तुति र हस्तकला प्रवर्द्धनको मञ्चका रूपमा पनि विकास गरिने उनले बताइन्।
विधायक राईले भविष्यमा यसलाई पर्यटकीय आकर्षणका रूपमा विकास गर्ने लक्ष्यसहित ज्येष्ठ नागरिकका लागि विशेष गरी प्रयोग हुने पर्यावरणमैत्री पार्क निर्माणाधीन रहेको जानकारी दिइन्। उनले युवालाई उद्यमशीलतामा लाग्न प्रोत्साहित गर्दै पहुँच र प्रचार बढाउन समर्पित वेबसाइटसमेत विकास गरिएको जानकारी दिइन्।
