सीएपी अध्यक्षले गरे सम्पूर्ण महिलाहरूलाई अन्यायका विरुद्ध एकजुट भई अगाडि बढ्न आह्वान

गान्तोक, 11 फरवरी । सिटिजन एक्सन पार्टी (सीएपी) सिक्किमको महिला परिषद्को सभा आज पार्टीका अध्यक्ष गणेश राईको अध्यक्षतामा सम्पन्न भयो।
सभामा महिला परिषद्की कार्यकारी उपाध्यक्ष तथा महिला प्रभारी सुमती छेत्री, केन्द्रिय कार्यकारी समितिकी कार्यकारी उपाध्यक्ष सन्जु राई, महिला परिषद्की अध्यक्ष बिना शर्मा, नाम्ची जिल्ला महिला परिषद्की अध्यक्ष हेलेन राई लगायत अन्य पदाधिकारीहरूको उपस्थिति रहेको थियो। सभामा सीएपी सिक्किमकी केन्द्रिय कार्यकारी समितिकी उपाध्यक्ष सन्जु राईलाई महिला परिषद्को प्रमुख सल्लाहकार पदमा नियु​क्त गरिएको महिला परिषदकी महासचिव अर्पणा राईले आज प्रेस विज्ञप्तिमा बताएकी छन्।
आफ्नो अध्यक्षीय सम्बोधनमा सीएपी अध्यक्ष गणेश राईले सानो-सानो सुविधाका लागि सिक्किमका महिलाहरूले सम्झौता गर्न बाध्य भइरहेको अवस्था रहेको उल्लेख गरे। उनले महिलाहरूलाई आफ्ना अधिकारका पक्षमा बोल्न नसक्ने वातावरण सिर्जना गरिएको र परिवारका अन्य सदस्य अन्य पार्टीमा आबद्ध भएकै कारण सामान्य रोजगारी गर्ने महिलासमेत राजनीतिक पूर्वाग्रहको शिकार बन्नुपरेको अवस्था सामान्य बन्दै गएको बताए।
महिलाका नाममा मीठा भाषण र कार्यक्रम आयोजना गरिए पनि पर्दा पछाडि उत्पीडन जारी रहेको आरोप लगाउॅंदै उनले यस्तो व्यवस्थाको विरोधस्वरूप नै सीएपी सिक्किमको स्थापना भएको स्पष्ट पारे। साथै, सम्पूर्ण महिलाहरूलाई अन्यायका विरुद्ध एकजुट भई अगाडि बढ्न र सशक्त आवाज उठाउन आह्वान उनले आह्वान पनि गरे। पार्टी सरकारमा आएपछि महिलालाई समान न्याय, समान अधिकार र सशक्तिकरण प्रदान गरी अधिकार सम्पन्न राज्य निर्माण गर्ने उनले प्रतिबद्धता व्यक्त गरे।
सभालाई महिला परिषदका वरिष्ठ नेतृत्वहरूले पनि सम्बोधन गरेका थिए।