नाम्ची जिल्लामा ध्वजवाहक पहल ‘आत्मियता’ को शुभारम्भलाई लिएर बैठक आयोजित

नाम्ची, 16 फरवरी । नाम्चीको टाउन हलमा आज ध्वजवाहक पहल ‘आत्मियता’ को शुभारम्भलाई लिएर एक बैठक आयोजना गरियो। बैठक नाम्ची जिल्लाकी जिल्लापाल अनुपा तामलिङको अध्यक्षतामा बसेको थियो।
यो पहल सिक्किम इन्स्पायर्सको तत्वावधानमा मानसिक स्वास्थ्य कानून र नीति केन्द्रसँगको प्राविधिक साझेदारीमा जिल्लामा शुरु गरिॅंदैछ। आत्मियता समुदायमा आधारित मानसिक स्वास्थ्य र सामाजिक हेरचाह सेवा मोडेलको आधारमा तयार गरिएको छ, जसको उद्देश्य समाजका सबै वर्गहरूमा स्वास्थ्य सेवा र उपचारमा पहुँच सुधार गर्नु हो।
बैठकमा मुख्यमन्त्रीका प्रेस सचिव युगेन तामाङले जनताको सामाजिक-आर्थिक स्थितिमा सुधार ल्याउनका लागि मुख्यमन्त्री प्रेमसिंह तामाङले समर्पण र करुणाका साथ काम गरिरहेको बताए। उनले वर्तमान समयमा निर्वाचित प्रतिनिधिहरू र सम्बन्धित विभागहरूले नजिकको समन्वयमा काम गर्नु अपरिहार्य रहेको कुरामा जोड दिए। उनले शासनको सीमा केवल ठोस विकाससम्म सीमित हुनुहुॅंदैन भन्दै मानसिक स्वास्थ्य जस्ता मुद्दाहरूमा पनि सक्रिय संलग्नता आवश्यक रहेको बताए। उनले सूचना प्रसारणमा मिडियाको महत्त्वपूर्ण भूमिकाको उल्लेख गर्दै राज्यमा यस पहलको बारेमा जागरूकता फैलाउन यसलाई रचनात्मक रूपमा प्रयोग गर्नुपर्ने सुझाउ राखे।
जिल्लापाल तामलिङले जिल्ला र राज्य दुवैमा पुस्तागत कल्याणको लागि यसको दीर्घकालीन फाइदाहरू उल्लेख गर्दै दिगो र सकारात्मक मानसिक स्वास्थ्य जागरूकता अभियानहरूको महत्त्वलाई जोड दिइन्। उनले विशेष गरी युवाहरूमा बढ्दो मानसिक स्वास्थ्य चिन्ताहरूलाई सम्बोधन गर्न जिल्ला प्रशासन र युवाहरूबीचको घनिष्ठ संलग्नताको आवश्यकतामा जोड दिइन्।
सिक्किम इन्स्पायर्सकी विशेष सचिव एवं अभियान निर्देशक रोहिणी प्रधानले समाजको हरेक वर्गलाई प्रभावकारी रूपमा सेवा गर्न तयार पारिएको संरचित मानसिक स्वास्थ्य योजनाहरूको आवश्यकतामा जोड दिइन्। उनले जिल्ला प्रशासनको सक्रिय हस्तक्षेपको प्रशंसा गरिन् तथा जिल्ला र राज्यको स्थानीय सामाजिक सन्दर्भ अनुरूप मोडेललाई अनुकूलित गर्न सिफारिस गरिन्।