नेपाली साहित्य परिषद् (नेसाप) सिक्किमले साहित्यकार चन्द्रप्रकाश शर्मा (प्रकाश भट्टराई) लाई प्रतिष्ठित साहित्य अकादमी पुरस्कार 2025 को निम्ति हार्दिक बधाई दिएको छ।

गान्तोक, 17 मार्च। नेपाली साहित्य परिषद् (नेसाप) सिक्किमले साहित्यकार चन्द्रप्रकाश शर्मा (प्रकाश भट्टराई) लाई प्रतिष्ठित साहित्य अकादमी पुरस्कार 2025 को निम्ति हार्दिक बधाई दिएको छ। उनको कृति ‘नेपाली पारम्परिक संस्कृति र सभ्यताको ढुकुटी’ लाई साहित्य अकादमी पुरस्कार प्रदान गरिने घोषणा भएको छ।
नेसाप सिक्किमले आज जारी आफ्नो बयानमा राष्ट्रको प्रतिष्ठित साहित्यिक संस्थान साहित्य अकादेमी, नयाँ दिल्लीले सन् १९७७ देखि नेपाली भाषाका कृतिमाथि प्रदान गर्दै आएको पुरस्कारअन्तर्गत वर्ष २०२५ को साहित्य अकादेमी पुरस्कार साहित्यकार चन्द्रप्रकाश शर्माको कृति ‘नेपाली पारम्परिक संस्कृति र सभ्यताको ढुकुटी’ लाई प्रदान गर्ने घोषणा वास्तवमै सिक्किमकै निम्ति महत् उपलब्धि रहेको परिषद्ले अनुभव व्यक्त गरेको छ।
परिषद्का अनुसार, यो गौरवपूर्ण उपलब्धि केवल एक व्यक्तिको सम्मानमा सीमित नभई समग्र सिक्किम तथा राष्ट्रकै नेपाली भाषा-साहित्य क्षेत्रका लागि अत्यन्तै गर्वको विषय हो। यस उपलब्धिले नेपाली भाषा, साहित्य र स्रष्टाहरूको सिर्जनात्मक योगदानलाई राष्ट्रिय तथा अन्तरराष्ट्रिय स्तरमा थप उचाइमा पुर्‍याउने विश्वास परिषद्ले व्यक्त गरेको छ।
परिषद्ले यस महत्वपूर्ण उपलब्धिको अवसरमा साहित्यकार शर्मालाई हार्दिक बधाई ज्ञापन गर्दै उनको साहित्यिक यात्रा अझ सशक्त, प्रेरणादायी र उन्नत बनिरहोस् भन्ने शुभकामना व्यक्त गरेको छ।