सीएपी अध्यक्ष सीजेएम समक्ष प्रस्तुत भए, राजनीतिक असहमतिलाई अपराधीकरण गरिएको आरोप

गान्तोक, 20 मई । सिटिजन एक्सन पार्टी (सीएपी) सिक्किमका अध्यक्ष गणेश कुमार राई आज समनको पालना गर्दै सीजेएम (प्रथम श्रेणी) को अदालत, रम्फू महकुमा प्रस्तुत भए। राई विरुद्ध राष्ट्रिय सम्मानको अपमान रोकथाम ऐन, १९७१ को धारा २ र प्रतीक तथा नाम (अनुचित प्रयोग रोकथाम) ऐन, १९५० को धारा ३ अन्तर्गत मामिला दर्ता भएको छ।
सीएपी सिक्किमले आज जारी प्रेस विज्ञप्तिमा भनेको छ, ‘सीएपी सिक्किमले राष्ट्रको न्यायिक प्रणालीको उच्चतम सम्मान गर्दछ। पार्टीले अदालतको निष्पक्षतामा पूर्ण विश्वास गर्दछ र सत्यको विजय सुनिश्चित गर्न कानुनी प्रक्रियामा पूर्ण रूपमा भाग लिन प्रतिबद्ध छ। सीएपीले अदालतको सम्मान गर्छ, तर राजनीतिक असहमतिलाई अपराधीकरण गर्ने वर्तमान राज्य सरकारको प्रयासको कडा निन्दा गर्दछ।’
सीएपीले पार्टीको बढ्दो प्रभाव र जनताप्रतिको अटल प्रतिबद्धताबाट डराएर सत्तारुढ व्यवस्थाले विपक्षीको आवाज दबाउन राज्य संयन्त्रलाई हतियार प्रयोग गर्ने प्रयास गरेको आरोप लगाएको छ। यी आरोपहरूको कानुनी आधार नरहेको दाबी गर्दै सीएपीले मद्रास उच्च अदालतसहित देशभरका विभिन्न अदालतहरूले बारम्बार शान्तिपूर्ण असहमति जनाउने अधिकारलाई समर्थन गरेको र उत्सवलाई राष्ट्रिय प्रतीकहरूको अपमानसँग तुलना गर्न सकिँदैन भनी फैसला सुनाएको बताएको छ।
सीएपीले सरकारको चुनौतीलाई स्वीकार गर्दै यस मुद्दामा आफ्नो निश्चित रूपमा जित हुने विश्वास व्यक्त गरेको छ। सिक्किमका जनतालाई दृढ रहन र निराश नहुन आग्रह गर्दै सीएपीले अन्याय, धम्की र भ्रष्ट शासनको अन्त्य गर्ने प्रतिबद्धता व्यक्त गरेको छ।