सीएपी सिक्किमको सबै छवटा जिल्लामा जिल्ला कार्यकारी परिषद् बैठक सम्पन्न

गान्तोक, 26 मई । सिटिजन एक्सन पार्टी (सीएपी) सिक्किमले राज्यका सबै छवटा जिल्ला गान्तोक, नाम्ची, सोरेङ, गेजिङ, मङ्गन तथा पाकिममा जिल्ला कार्यकारी परिषद् बैठकहरूको शृङ्खला सफलतापूर्वक सम्पन्न गरेको छ। ८ देखि २६ मई, २०२६ सम्म सञ्चालन गरिएका यी विस्तृत बैठकहरू पार्टीद्वारा संगठनलाई तल्लो तहसम्म सुदृढ़ बनाउने तथा आन्तरिक लोकतान्त्रिक सहभागिता अझ गहिरो बनाउने उद्देश्यले सञ्चालन गरिएको प्रेस विज्ञप्तिमा उल्लेख छ।बैठकहरूको अध्यक्षता पार्टी अध्यक्ष गणेश के. राईले गरेका थिए। बैठकहरूमा पार्टीका वरिष्ठ पदाधिकारीहरू, एसीईसी अध्यक्षहरू, कार्यकारी परिषद् सदस्यहरू, पार्टी कार्यकर्ताहरू तथा जिल्ला नेताहरूको सक्रिय सहभागिता रहेको थियो। यस जिल्ला स्तरीय सम्पर्क कार्यक्रमको अन्तिम बैठक आज पाकिम जिल्लाको रिनाक निर्वाचन क्षेत्रअन्तर्गत साजोङमा सम्पन्न भयो। बैठकमा नेताहरू र कार्यकर्ताहरूले स्वतन्त्र रूपमा आफ्ना विचार राख्दै पार्टीको विकास, दिशा तथा भावी आकांक्षाबारे धारणा आदानप्रदान गरे।सम्बोधनका क्रममा पार्टी अध्यक्ष राईले यस्ता संगठनात्मक सम्पर्क कार्यक्रमहरूको महत्त्वमाथि जोड दिँदै राज्यका सबै छवटा जिल्लामा बैठक सम्पन्न हुनु हालका दिनहरूमा पार्टीको एक महत्वपूर्ण उपलब्धि भएको बताए। उनले कुनै पनि राजनीतिक आन्दोलनको शक्ति केवल नेतृत्व संरचनामा मात्र नभई तल्लो तहमा निरन्तर काम गर्ने कार्यकर्तासँग जोडिइरहने क्षमतामा निहित रहने उल्लेख गरे।उनले यी बैठकहरू केवल प्रशासनिक अभ्यास नभई संगठनको भावना बुझ्ने, सुन्ने तथा सिक्ने महत्वपूर्ण प्रक्रिया रहेको बताए। जिल्ला कार्यकारी परिषद्सँग गरिएको व्यापक संवादबाट प्राप्त सकारात्मक सुझाउ तथा मूल्यवान अनुभवहरूले पार्टीको संगठनात्मक आधारलाई अझ सुदृढ़ बनाउन महत्वपूर्ण योगदान पुर्याउने उनले विश्वास व्यक्त गरे।संगठन विस्तार तथा संस्थागत सुदृढीकरणप्रतिको पार्टीको निरन्तर प्रतिबद्धतालाई प्रतिबिम्बित गर्दै यी बैठकहरूको अवधिभर विभिन्न जिल्लाका नेता तथा पार्टी सदस्यहरूलाई औपचारिक रूपमा ३०० भन्दा बढी नियुक्तिपत्र वितरण गरिएको थियो। उनले सीएपी सहभागितामूलक नेतृत्व तथा सामूहिक जिम्मेवारीमा विश्वास गर्दछ भन्दै पार्टीले प्रत्येक कार्यकर्तालाई परिवर्तनको यात्राको हिस्सेदारका रूपमा हेर्ने उल्लेख गरे।