नाम्ची, 24 जुलाई। मुख्यमन्त्री प्रेमसिंह तामाङले आज नाम्चीको सालघारी अन्तर्गत अप्पर डोरोपस्थित नवनिर्मित पेमा छोलिङ गुम्बाको उद्घाटन गरे। कार्यक्रममा सिक्किम विधानसभाकी उपाध्यक्ष राजकुमारी थापा, शहरी विकास विभागका मन्त्री भोजराज राई तथा भवन तथा आवास विभागका मन्त्री भीमहाङ लिम्बूको उपस्थित थिए।गुम्बा उद्घाटन समारोहलाई सम्बोधन गर्दै मुख्यमन्त्रीले गुम्बा व्यवस्थापन समिति तथा सालघारीवासीलाई गुम्बा निर्माण सम्पन्न भएकोमा बधाई दिए। सालघारीबाट नै आफूले मुख्यमन्त्रीको यात्राको शुरुवात गरेको स्मरण गर्दै उनले यस क्षेत्रका जनताको हितका लागि आगामी दिनमा पनि विकासका कार्यक्रमहरूलाई प्राथमिकता दिइने बताए।राज्य सरकारले धार्मिक संस्थाहरूको निर्माणसँगै सिक्किमभरि विकासका अन्य योजनाहरूलाई पनि निरन्तर सहयोग गर्ने उनले प्रतिबद्धता दोहोर्याए। पूर्वाधार विकासबारे जानकारी दिँदै उनले असाङथाङ-चिसोपानी सडक परियोजनालाई स्वीकृति प्रदान गरिएको, नाम्ची बजारका लागि तीनवटा फ्लाइओभर निर्माणको स्वीकृति दिइएको तथा सार्वजनिक कार्यक्रम सञ्चालनका लागि नाम्चीमा ठूलो सार्वजनिक पार्क निर्माण गरिने घोषणा गरे।मुख्यमन्त्रीले गुम्बा सम्पूर्ण समाजको साझा आस्थाको केन्द्र रहेको उल्लेख गर्दै सबैलाई एकता, पारस्परिक सम्मान र साम्प्रदायिक सद्भाव कायम राख्न आग्रह गरे। सिक्किमको सबैभन्दा ठूलो शक्ति शान्तिपूर्ण सहअस्तित्व रहेको बताउँदै उनले विभिन्न समुदायहरूले आफ्नो परम्परा र सांस्कृतिक सम्पदालाई संरक्षण तथा प्रवर्द्धन गरिरहेको उल्लेख गरे। साथै राज्य सरकारले सिक्किमको समृद्ध सांस्कृतिक सम्पदाको संरक्षण र प्रवर्द्धनमा निरन्तर काम गरिरहने प्रतिबद्धता व्यक्त गरे।मुख्यमन्त्री नोभेम्बरअघि पोक्लोक-कामराङसहित विभिन्न निर्वाचन क्षेत्रको भ्रमण गरी जनतासँग प्रत्यक्ष भेटघाट गर्दै उनीहरूको गुनासो सुन्ने जानकारी दिए। शिक्षा र स्वास्थ्य क्षेत्रबारे बोल्दै उनले मुख्यमन्त्री शिक्षा सहायता योजना अन्तर्गत सिक्किमका ११० जना विद्यार्थीलाई हेलेन लेप्चा मेडिकल कलेजमा निःशुल्क चिकित्सा शिक्षा प्रदान गरिने घोषणा गरे। साथै देशका प्रतिष्ठित अस्पतालहरूमा विशेष उपचार आवश्यक पर्ने बिरामीहरूलाई राज्य सरकारले सहयोग निरन्तर उपलब्ध गराउने प्रतिबद्धता पनि दोहोर्याए।उनले आगामी १० अगस्तमा नाम्चीस्थित भाइचुङ स्टेडियममा करिब १,००० लाभग्राहीका लागि आमा योजना कार्यक्रम आयोजना गरिने जानकारी दिँदै सबै लाभग्राहीलाई कार्यक्रममा सहभागी हुन आग्रह गरे। साथै यस वर्ष राज्यभरिका २०० भन्दा बढी स्वयं सहायता समूहलाई आर्थिक सहयोग उपलब्ध गराइने र आगामी वर्षहरूमा यो सङ्ख्या अझ बढाइने जानकारी दिए।रोजगारीसम्बन्धी सुधारबारे बोल्दै मुख्यमन्त्रीले अबदेखि सरकारी सेवामा पुनर्नियुक्तिको सुविधा समूह ‘सी’ र समूह ‘डी’ का कर्मचारीहरूमा मात्र सीमित गरिने बताए। स्थानीयवासीलाई सम्बोधन गर्दै उनले पेमा छोलिङ गुम्बालाई प्रमुख पर्यटन गन्तव्यका रूपमा विकास गर्न आग्रह गरे। सडक विस्तार तथा यातायात पहुँचमा सुधार भएपछि स्थानीय जनताका लागि नयाँ आर्थिक अवसर सिर्जना हुने विश्वास पनि व्यक्त गरे।उनले राज्यको आर्थिक अवस्थाबारे जानकारी दिँदै आर्थिक वर्ष २०२६-२७ को बजेट अनुमान १८ हजार ४५५ करोड रुपियाँ पुगेको, जुन अघिल्लो आर्थिक वर्षको तुलनामा २ हजार २४५ करोड रूपियाँ अधिक रहेको बताए।
