एमजी मार्गमा समाचारपत्र पठन केन्द्र ‘खबरदानी’ को शुभारम्भ

गान्तोक, 20 अगस्त। जर्नलिस्ट युनियन अफ सिक्किमले (जेयूएस) ले जनतामा पठन संस्कृतिको विकास तथा समाचारपत्र र पत्रिकाप्रति रुचि बढाउने उद्देश्यले गान्तोकको एमजी मार्गमा समर्पित समाचारपत्र पठन केन्द्र ‘खबरदानी’ सञ्चालनमा ल्याएको छ। केन्द्रको उद्घाटन कार्यक्रममा आज विधायक दिले नामग्याल बर्फुङपा, गान्तोक नगर निगमकी मेयर छिरिङ पाल्देन भोटिया, पार्षद सन्दीप मालु, सिक्किम राज्य महिला आयोगकी सदस्य जुनु छेत्री तथा जेयूएसको कार्यसमिति र सदस्यहरूको उपस्थिति थियो।कार्यक्रमलाई सम्बोधन गर्दै प्रमुख अतिथि विधायक बर्फुङपाले आम जनतामा पठन संस्कृतिको विकास गर्ने जेयूएसको पहलको प्रशंसा गरे। उनले प्रविधिको बढ्दो प्रभावका कारण समाजमा पठन संस्कृतिमा क्रमशः कमी आएको र समाचारपत्र तथा अन्य पठन सामग्रीप्रतिको रुचि घट्दै गएको बताए।जेयूएसका अध्यक्ष प्रविण खालिङले ‘खबरदानी’ समाजमा पठन संस्कृतिलाई पुनर्जीवित गर्ने दिशामा सानो तर अर्थपूर्ण प्रयास रहेको बताए। एमजी मार्गमा लगभग सबै प्रकारका सामग्री उपलब्ध भए पनि पठन संस्कृतिमा आएको गिरावटका कारण समाचारपत्र पाउन कठिन हुँदै गएको उनले उल्लेख गरे।उनले समाचारपत्र विक्रेताहरूले भोगिरहेको समस्याबारे पनि प्रकाश पार्दै समाचारपत्र पढ्नेको संख्या घट्दा उनीहरूको जीविकोपार्जनमा प्रत्यक्ष असर परेको र धेरै विक्रेताले आफ्नो आम्दानीको स्रोत गुमाइसकेको बताए।गान्तोक नगर निगमकी मेयर छिरिङ पाल्देन भोटियाले जेयूएसलाई बधाई दिँदै ‘खबरदानी’ पहलको प्रशंसा गरे। उनले आवश्यक परेको समयमा गान्तोक नगर निगमले जेयूएसलाई आवश्यक सहयोग र सहकार्य उपलब्ध गराउने आश्वासन दिइन्।कार्यक्रमको समापनमा जेयूएसका सल्लाहकार तथा वरिष्ठ पत्रकार भीम राउतले धन्यवाद ज्ञापन गरे। उनले नेपाली समाजमा समाचारपत्र तथा पत्रिकाहरूको महत्वमाथि प्रकाश पार्दै समाचारपत्रहरू समाजका ऐतिहासिक दस्तावेजसमेत रहेको बताए।डिजिटल युगमा समेत समाचारपत्र प्रकाशन र पठन संस्कृतिलाई प्रवर्द्धन गर्नुपर्नेमा जोड दिँदै राउतले नेपाली भाषालाई संवैधानिक मान्यता दिलाउने प्रक्रियामा ‘सुनचरी’ ले खेलेको महत्वपूर्ण भूमिकाको पनि स्मरण गरे।‘खबरदानी’ समाचारपत्र पठन केन्द्र २४ घण्टा, सातै दिन खुल्ला रहनेछ। एमजी मार्गमा सर्वसाधारणले यहाँ निःशुल्क रूपमा समाचारपत्र तथा पत्रिकाहरू पढ्न सक्नेछन्। केन्द्रमा अंग्रेजी, नेपाली र हिन्दी भाषाका समाचारपत्र उपलब्ध हुने जेयूएस प्रचिर सचिव अनुशिला शर्माले जनाएकी छन्।