ग्रामीण विकास विभाग बन्यो पहिलो अन्तर विभाग क्रिकेट टुर्नामेन्ट च्याम्पियन

पाकिम, 03 मार्च । पहिलो अन्तर विभाग क्रिकेट टुर्नामेन्टको उपाधि राज्य ग्रामीण प्रबन्धन विभागले आफ्नो नाम गरेको छ। सिक्किम क्रिकेट एसोसिएशनले आयोजना गरेको उक्त टुर्नामेन्टको फाइनल आज ग्रामीण प्रबन्धन विभाग र वाणिज्य एवं उद्योग विभागबीच सम्पन्न भयो। फाइनलमा ग्रामीण प्रबन्धन विभागले प्रतिद्वन्दी विभागलाई सात विकेटले पराजित गरेर उपाधि आफ्नो नाम गऱ्यो।
पहिलो अन्तर विभाग क्रिकेट टुर्नामेन्टको फाइनल खेल ग्रामीण प्रबन्धन विभाग र वाणिज्य एवं उद्योग विभागबीच एक मार्चमा प्रस्तावित थियो। तर, वर्षाका कारण खेल स्थगित गरिएको थियो। आज सिक्किम क्रिकेट मैदान, रम्फूमा सम्पन्न फाइनलमा विधायक सन्जित खरेल मुख्य अतिथि थिए। यस अवसरमा ग्रामीण विकास विभागका मन्त्री अरुण उप्रेती पनि उपस्थित थिए।
विजेता दललाई ट्रफीसहित 10 लाख रूपियॉं पुरस्कार राशि र उपविजेता दललाई ट्रफीसहित 5 लाख रूपियॉं पुरस्कार राशि प्रदान गरियो। विजयी दलका विनोद छेत्रीलाई उनका उत्कृष्ट प्रदर्शनका लागि प्लेयर अफ द फाइनल चयनित गरियो। यसरी नै उपविजेता दलका पेम्पा तामाङलाई प्लेयर अफ द टुर्नामेन्ट पुरस्कार प्रदान गरियो। विजयी दल प्रणिल प्रधानलाई सर्वाधिक विकेट लिने खेलाडी र उपविजेता दलका पेम्पा तामाङलाई सर्वाधिक रन बनाउने खेलाडीका रूपमा पुरस्कृत गरियो।
यस टुर्नामेन्टमा विभिन्न सरकारी विभाग र सार्वजनिक क्षेत्रका उपक्रम गरी 28 दलले भाग लिएको थियो। यस प्रतियोगिता आयोजना गर्नुको उद्देश्य राज्यमा बलियो खेलकुद संस्कृतिलाई प्रवर्द्धन गर्दै सरकारी कर्मचारीहरूमाझ टिमवर्क र खेल भावनालाई प्रवर्द्धन गर्नु रहेको बताइएको छ।