थप ६४ प्रजातिका पुतलीहरू पत्ता लागेसँगै राज्यमा पुतली प्रजातिहरूको संख्या ७५३ पुग्यो

गान्तोक, 10 मई। द बटरफ्लाइज एण्ड मथ्स अफ सिक्किम नेचर कन्जर्भेसन सोसाइटी (बामोस एनसीएस) ले आफ्नो प्रतिक्षित पुस्तक “बटरफ्लाइज अफ सिक्किम: एन अपडेटेड चेकलिस्ट अफ सिक्किम हिमालय” को आधिकारिक विमोचन गरेको छ। संरक्षणविद् मातृका शर्मा र दोर्जी छेवाङ भोटियाद्वारा लिखित यो प्रकाशन पूर्वी हिमालयभित्र जैविक विविधताको दस्तावेजीकरणमा एक महत्त्वपूर्ण उपलब्धि रहेको बताइएको छ।
पुस्तकको विमोचन पर्यटन तथा नागरिक उड्डयन विभागका अतिरिक्त मुख्य सचिव सीएस राव, पुलिस महानिरीक्षक खिलवर्ण गुरुङ, सीसीएफ सुरज कुमार थटाल, सिक्किम केन्द्रिय विश्वविद्यालयका डीन प्रा. डा. भोज कुमार आचार्य, वरिष्ठ वैज्ञानिक डा. घनश्याम बास्तोला, वरिष्ठ वैज्ञानिक डा. सोनाम रिन्छेन लेप्चा, आईएचसीएसी चेम्चेका प्राचार्य काजी शेर्पा र सेवानिवृत्त कर्नल दावा नामग्याल भोटियाको बाहुलीद्वारा गरियो।
यस अद्यावधिक चेकलिस्टको मुख्य आकर्षण सिक्किमको पुतली विविधताको महत्त्वपूर्ण संशोधन हो। अघिल्ला रेकर्डहरूमा ६८९ प्रजातिहरू थिए भने शर्मा र भोटियाद्वारा गरिएको व्यापक अनुसन्धान र क्षेत्र प्रमाणीकरणपछि आधिकारिक गणना बढाएर ७५३ प्रजाति पुर्‍याएको छ। राज्यको जीवजन्तु अभिलेखमा ६४ प्रजातिहरूको यो वृद्धिले विश्वव्यापी जैविक विविधता हटस्पटको रूपमा सिक्किमको स्थितिलाई बलियो बनाएको बताइएको छ।
लेखकहरूले भने, “यो पुस्तक केवल एउटा सूची मात्र होइन, यो हाम्रो पहाडहरूको समृद्ध पारिस्थितिक प्रणालीको प्रमाण हो। यो सूची अद्यावधिक गरेर हामी भविष्यको संरक्षण नीतिहरूको लागि आधारभूत आधार प्रदान गर्ने र सिक्किम हिमालयमा पुतली हेर्नेहरूको नयाँ पुस्तालाई प्रेरित गर्ने आशा गर्दछौं।”
बामोस एनसीएसले पर्यटन एवं नागरिक उड्डयन विभाग र वन तथा पर्यावरण विभागलाई संस्थागत सहयोगको लागि आभार व्यक्त गरेको छ।