गान्तोक, 07 अगस्त। दार्जिलिङका लोकसभा सांसद राजु विष्टले बुधवार नयॉं दिल्लीमा केन्द्रिय गृहमन्त्री अमित शाहसॅंग भेट गरेर दार्जिलिङ पहाड़, तराई अनि डुवर्सका जनताको तर्फबाट भारतको सबैभन्दा लामो समयसम्म गृहमन्त्रीको रुपमा सेवा दिइरहेकोमा उनलाई बधाई टक्र्याएका छन्। सांसद विष्टले एक प्रेस विज्ञप्तिमा उक्त जानकारी गराएका छन्।
उनले यस भेटमा दार्जिलिङसँग सम्बन्धित विभिन्न प्रशासनिक तथा राजनीतिक विषयहरूमा केन्द्रिय गृहमन्त्रीसॅंग छलफल गरेको पनि जानकारी गराएका छन्। उनले विशेषगरी दार्जिलिङ पहाड़, तराई अनि डुवर्समा न्याय, विकास र शान्ति सुनिश्चित गर्नका लागि स्थायी राजनीतिक समाधानको प्रक्रिया तीव्र पार्नु आवश्यक रहेको कुरामा जोड दिएको बताएका छन्। यस क्षेत्रका जनताको दीर्घकालीन आकांक्षाहरूलाई सम्बोधन गर्न केन्द्र सरकारको निरन्तर समर्थन र प्रतिबद्धताप्रति आभार व्यक्त गर्दै शाहलाई यस दिशामा तीव्र पाइला चालिदिन उनले आग्रह गरेका छन्।
गृहमन्त्री अमित शाहले दार्जिलिङ क्षेत्रको विशेष पहिचान र आकांक्षालाई सम्मान गर्ने संवैधानिक ढाँचा निर्माण गर्ने दिशामा सरकार प्रतिबद्ध रहेको आश्वासन दिएको सांसद विष्टले विज्ञप्तिमा उल्लेख गरेका छन्। गृहमन्त्रालयले यस विषयमा कार्य गरिरहेको बताउँदै छिट्टै ठोस सकारात्मक कदमहरू चालिने जानकारी दिएको पनि उनले जनाएका छन्।
सांसद विष्टले आजको बैठकपछि प्रधानमन्त्री नरेन्द्र मोदीको नेतृत्व र गृहमन्त्री अमित शाहको मार्गदर्शनमा दार्जिलिङ पहाड़, तराई अनि डुवर्स क्षेत्रका जनताको उज्वल भविष्यप्रति आफू विश्वस्त बनेको बताएका छन्।
