नयाँ दिल्ली, 29 मई। प्रधानमन्त्री नरेन्द्र मोदीले 50 वर्ष अगाड़ि सिक्किमले लोकतान्त्रिक भविष्य रोजेको थियो र राज्य देशको आत्मासँग जोडिएको थियो भनी बताएका छन्। आज देश सिक्किमको प्रगतिको साक्षी बनेकाे र अब सिक्किम राज्य जैविक विविधता, सांस्कृतिक समृद्धि र सय प्रतिशत जैविक राज्यको रूपमा देशको गौरव बनिसकेको उनले बताएका छन्।
प्रधानमन्त्री नरेन्द्र मोदीले आज भर्चुअल माध्यमबाट ‘सिक्किम@50’ कार्यक्रमलाई सम्बोधित गर्दै एकता, सन्तुलित विकास र पूर्वोत्तरको सशक्तिकरणको सन्देश दिए। कार्यक्रम सिक्किम राज्य स्थापनाको 50औं वर्ष पूरा भएको अवसरमा आयोजित गरिएको थियो।
प्रधानमन्त्री मोदीले आफ्नो भाषणमा पहलगामको पनि उल्लेख गर्दै भने, पर्यटकहरूमाथि भएको आतङ्कवादी हमला केवल भारतीयहरूमाथि नभएर मानवताको आत्मा र भाइचाराको भावनामाथि हमला थियो। यो हाम्रो सांस्कृतिक एकता र सामाजिक संरचना तोड्ने षड्यन्त्र थियो। आतङ्ककारीहरूले निर्दोष परिवारहरूको खुशी खोसे, तर भारतले एक भएर जवाफ दियो। अपरेशन सिन्दूर मार्फत हामीले आतङ्ककारीहरूलाई पाठ मात्र सिकाएनाैं, तर सम्पूर्ण विश्वलाई सटीक र द्रुत कारबाही गर्ने हाम्रो क्षमता पनि देखायौं।
राष्ट्रिय विकासको सन्दर्भमा ‘सबका साथ, सबका विकास’ को सिद्धान्तलाई दोहोऱ्याउँदै प्रधानमन्त्री मोदीले समग्र भारतको विकासको लागि उत्तर-पूर्वको सशक्तिकरण आवश्यक रहेको बताए। उनले भने, हालैमा दिल्लीमा आयोजित उत्तर-पूर्वी इन्वेस्टमेन्ट शिखर सम्मेलनमा धेरै ठूला लगानीकर्ताहरूले भाग लिए र सिक्किम सहित सम्पूर्ण क्षेत्रमा लगानीको घोषणा गरे।
सिक्किम र उत्तर-पूर्वको कनेक्टिभिटीबारे प्रधानमन्त्रीले भने, गत एक दशकमा राज्यमा 400 किलोमिटरभन्दा अधिक राष्ट्रिय राजमार्गहरू निर्माण गरिएको छ। अटल सेतु, बागडोगरा-गान्तोक एक्सप्रेसवे र सेवक-रम्फू रेलवे लाइन जस्ता परियोजनाहरू राज्यलाई देशको बाँकी भागसँग जोड्न माइलखुट्टी प्रमाणित हुनेछन्। प्रधानमन्त्रीले भने, जहाँ सडक बनाउन सकिँदैन, त्यहाँ रोपवे बनाइँदैछ। उनले आज उद्घाटन गरिएका रोपवे परियोजनाहरूको बारेमा उल्लेख गरे। उनले 500 बेडको अस्पतालको शिलान्यास गरे, जसले गरीब र वरिष्ठ नागरिकहरूलाई राम्रो स्वास्थ्य सेवा प्रदान गर्ने बताए।
सिक्किमका किसानहरूको प्रशंसा गर्दै प्रधानमन्त्रीले भने, राज्यले जैविक खेतीको क्षेत्रमा भारतको नेतृत्व गरिरहेको छ। हालमा सिक्किमको प्रसिद्ध ‘डल्ले खोर्सानी’ निर्यात भइरहेको छ। उनले सोरेङ जिल्लामा देशको पहिलो जैविक मत्स्य पालन क्लस्टर निर्माण भइरहेको घोषणा गरे, जसले युवाहरूलाई माछापालनमा नयाँ अवसरहरू प्रदान गर्नेछ।
प्रधानमन्त्रीले सिक्किमलाई विश्वव्यापी पर्यटकीय गन्तव्य बनाउने आवश्यकतामाथि जोड दिए। उनले कञ्चनजङ्घा नेशनल पार्क, बौद्ध गुम्बा, ताल, झरना र शान्त वातावरणलाई विश्वव्यापी स्तरमा प्रस्तुत गर्नबारे कुरा गरे। उनले स्वर्ण जयन्ती कन्भेन्सन सेन्टर र स्काईवाक जस्ता परियोजनाहरूलाई भविष्यका पर्यटकीय केन्द्रहरूको रूपमा वर्णन गरे। प्रधानमन्त्रीले सिक्किमलाई एडवेञ्चर, वेलनेस, संगीत र सम्मेलन पर्यटनको केन्द्र बनाइने बताए। उनले उत्तरपूर्वमा आयोजित जी-20 बैठकहरूलाई अन्तरराष्ट्रिय मञ्चमा यस क्षेत्रको क्षमता देखाउने प्रय़ास बताए।
भाईचुङ भोटिया र तरुणदीप राई जस्ता सिक्किमेली खेलाड़ीहरूको नाम उल्लेख गर्दै प्रधानमन्त्रीले भने, हरेक गाउँबाट एक नयाँ च्याम्पियन निस्किनुपर्छ। उनले गान्तोकमा नयाँ खेलकुद परिसरको प्रशंसा गर्दै सिक्किमले ‘खेलो इन्डिया’ योजना अन्तर्गत विशेष सहयोग पाइरहेको बताए। प्रधानमन्त्री मोदीले सिक्किमलाई ‘हरित मोडेल राज्य’ बनाउने लक्ष्यको घोषणा गरे।
उनले भने, प्रत्येक घरलाई सौर्य ऊर्जाले उज्यालो पार्नु, डिजिटल लेनदेनलाई प्रोत्साहन दिनु र ‘वेस्ट टु वेल्थ’ जस्ता कदमहरू आवश्यक हुन्। सिक्किमलाई जैविक खाद्य र कृषि-स्टार्टअपहरूको लागि विश्वव्यापी केन्द्रको रूपमा स्थापित गरिनेछ। उनले 2047 सम्म सिक्किमलाई विश्व मञ्चमा विकसित, समृद्ध र सशक्त राज्यको रूपमा स्थापित गर्ने प्रतिबद्धता व्यक्त गरे र सबै नागरिकहरूलाई आगामी 25 वर्ष यसका लागि समर्पित गर्ने आग्रह गरे।
सिक्किमको सांस्कृतिक सम्पदा, प्राकृतिक सौन्दर्य र जनशक्तिको प्रशंसा गर्दै प्रधानमन्त्रीले यस स्वर्ण जयन्तीको अवसरले राज्यको विकास यात्रालाई नयाँ शिखरहरूसम्म पुऱ्याउनेछ भनी बताए। यस अवसरमा सिक्किमका राज्यपाल ओमप्रकाश माथुर र मुख्यमन्त्री प्रेम सिंह तामाङ लगायत धेरै विशिष्ट व्यक्तिहरू उपस्थित थिए।
