भाजपा सिक्किमको समन्वय बैठक, जनकेन्द्रित कार्यक्रमहरूमा सक्रिय रूपमा भाग लिन आग्रह

गान्तोक, 03 जून। भारतीय जनता पार्टी (भाजपा) सिक्किमको हिजो पश्चिम सिक्किम अन्तर्गत हि-गाउॅंमा एक वृहत समन्वय बैठक आयोजन गरियो। बैठकमा प्रदेश अध्यक्ष डीआर थापा, राज्य उपाध्यक्ष एनके सुब्बा, महासचिव दिनेशचन्द्र नेपाल, राज्य सचिव बिजय प्रसाद सुब्बा, गेजिङ जिल्ला अध्यक्ष दिगुम लिम्बू लगायत अन्यहरू उपस्थित थिए।
बैठक आयोजन गर्नुको मुख्य उद्देश्य तृणमूल स्तरमा संगठनात्मक शक्ति बढाउनु, बुथ-स्तरीय समितिहरूलाई सक्रिय बनाउनु र केन्द्रमा मोदी सरकारको १२ वर्षको सम्झनामा आगामी कार्यक्रमहरूमा व्यापक सहभागिता सुनिश्चित गर्नु थियो।
प्रदेश अध्यक्ष थापाले आफ्नो सम्बोधनमा प्रधानमन्त्री नरेन्द्र मोदीको नेतृत्वमा १२ वर्षको परिवर्तनकारी शासनको अवसरमा पार्टीद्वारा निर्देशित प्रमुख कार्यक्रमहरूमाथि प्रकाश पारे। उनले सबै पार्टी पदाधिकारीहरूलाई विश्व पर्यावरण दिवस, जन कल्याण शिविर, स्वच्छता अभियान, अन्तरराष्ट्रिय योग दिवस र अन्य जनकेन्द्रित कार्यक्रमहरू लगायत प्रमुख पहुँच पहलहरूमा सक्रिय रूपमा भाग लिन आग्रह गरे।
अध्यक्ष थापाले केन्द्र सरकारका योजनाहरूको लाभ र उपलब्धिहरूलाई समाजको अन्तिम व्यक्तिसम्म पुर्‍याउने आवश्यकतामा जोड दिए। उनले जिल्लाभरि हालको संगठनात्मक कार्यप्रणाली र गतिविधिहरूको पनि समीक्षा गरे। बैठकमा थापाले भाजपामा सामेल भएका ८ परिवारलाई औपचारिक रूपमा स्वागत गरेको प्रेस विज्ञप्तिमा बताइएको छ।
प्रदेश उपाध्यक्ष एनके सुब्बाले सबै पदाधिकारीहरूलाई पार्टी निर्देशनहरू कडाईका साथ पालना गर्न, सबै तहमा निर्बाध समन्वय सुनिश्चित गर्न र तोकिएका कार्यक्रमहरूको सफल कार्यान्वयनको लागि समर्पित भएर काम गर्न आह्वान गरे।
यसअघि दिनभरि याङथाङ निर्वाचन क्षेत्र अन्तर्गत दारापको आफ्नो संगठनात्मक भ्रमणका क्रममा १६ परिवार भाजपामा सामेल भएको र उनीहरूलाई राज्य नेतृत्वले स्वागत जनाएको बताइएको छ।